१९ असार २०८३, शुक्रबार
प्रधानमन्त्री एवं नेकपा एमालेका अध्यक्ष केपी शर्मा ओलीले मुख्य राजनीतिक दलले एक्ला एक्लै चुनाव लड्ने उद्घोष गरेपछि माओवादी केन्द्र अस्तित्व संकटको प्रश्नले त्रसित बनेको टिप्पणी गरेका छन् । अस्थिरतामा रमाएका शक्तिहरू अहिले सुनियोजित प्रयासमा लागेको ओलीको आरोप छ ।
केन्द्रीय कमिटी बैठकमा पेश गरेको राजनीतिक प्रतिवेदनमा ओलीले हैसियतभन्दा अत्यधिक लाभ लिइरहेका समूहमा बेचैनी उत्पन्न भएको आरोप लगाएका हुन् । ‘आगामी निर्वाचन पनि मुख्य राजनीतिक दलहरूले एक्लै लड्ने उद्घोष गरेपछि अस्थिरतामा रमाइरहेका र आफ्नो लगानी एवं हैसियतभन्दा अत्यधिक लाभ लिइरहेका समूहमा बेचैनी उत्पन्न भइरहेको छ,’ ओलीले प्रतिवेदनमा भनेका छन्, ‘ती मध्ये कतिपयलाई अस्तित्व संकटको प्रश्नले त्रसित बनाएको छ भने कतिलाई हङ पार्लियामेन्ट भित्र खेलिने झिँगे दाउको खेल अन्त्य हुने चिन्ताले सताएको छ ।’
राजनीतिक प्रतिवेदनमा ओलीले माओवादीले पूर्वराजावादीसँग बसाउठी गरिरहेको आरोपसमेत लगाएका छन् । ‘ऊ (माओवादी) राष्ट्रिय एकता र सामाजिक सद्भावमा आँच पुर्याउन उद्दत देखिएको छ । पूर्वराजावादीसँग बाक्लै बसाउठी गरिरहेको छ,’ ओलीले भनेका छन् ।
