नेपाली कांग्रेसका नेता डा. शेखर कोइरालाले बेलायती कन्जरभेटिभ पार्टीका नेता जेम्स क्लेभर्लीसँग भेटघाट गरेका छन् । 

बेलायत भ्रमणमा रहेका नेता कोइरालाले संसद् भवन (हाउस अफ कमन्स)मा एवं पूर्वविदेशमन्त्री समेत रहेका क्लेभर्लीसँग भेटघाट गरेका हुन् । 

भेटमा नेपाल-बेलायत सम्बन्ध, आपसी सहयोगजस्ता विषयमा कुराकानी भएको कोइरालाको सचिवालयले जनाएको छ ।

कोइरालाले नेपालमा बेलायती सहयोगमार्फत् बनेका आयोजनामा थप सहयोगका निम्ति आग्रह गरेका छन् ।

कोइरालाले यसअघि बुधबार तत्कालीन शान्ति प्रक्रियामा निकै महत्त्वपूर्ण भूमिका खेलेको अनमिनका नेपाल प्रमुख इयान मार्टिनसँग भेटघाट गरेका थिए । 

लन्डनमा भएको भेटघाटका क्रममा मार्टिनले अहिले पनि नेपालको शान्ति प्रक्रिया अझै नटुङ्गिएकोले जतिसक्दो छिटो टुङ्ग्याउन सुझाव दिएका थिए ।