सामाजिक सञ्जाल फेसबुकमा चिनजान भएकै भरमा एक युवतीले श्रीकृष्ण कार्कीसँग प्रेम सम्बन्ध गाँस्छिन् । प्रगाढ प्रेममा परेका कार्की र युवतीले सहमतिमै अन्तरंग तस्वीर र भिडियो खिच्छन् । 

त्यतिबेला अश्लील तस्वीर बाहिरिने डर दुवैमा हुँदैन । एकाएक युवती र कार्कीबीचको प्रेम सम्बन्धमा फाटो आउँछ । कार्कीले ती युवतीसँग लिएका अश्लील फोटो र भिडियो उनका आफन्त र साथीहरूलाई पठाइदिन्छन् । आफन्तले युवतीलाई उक्त तस्वीर र भिडियोका सम्बन्धमा सोधीखोजी गरेपछि युवती प्रहरीको शरणमा पुग्छिन् ।

भोटाहिटीस्थित साइबर ब्यूरोमा ती युवतीले जाहेरी दिएपछि प्रहरीले कार्कीलाई पक्राउ गरेको छ । रामेछापको खाँडादेवी गाउँपालिका–८ धुलेबेसी घर भएर काठमाडौं महानगरपालिका–१३ बस्ने कार्कीविरुद्ध प्रहरीले विद्युतीय कारोबार ऐन, २०६३  अन्तर्गत काठमाडौं जिल्ला अदालतबाट चार दिनको म्याद लिएर अनुसन्धान गरिरहेको छ । 

साइबर ब्यूरोमा अर्को त्यस्तै घटना दर्ता भएको छ । एक महिलाले भोजपुर षडानन्द नगरपालिका–५ घर भएर बौद्ध बस्ने सरोज कटुवालसँग प्रेम सम्बन्ध राख्छिन् । कटुवालले ती महिलाकै सहमतिमा अश्लील फोटो र भिडियो खिच्छन् । महिलासँगको सम्बन्धमा खटपट भएपछि कटुवालले पहिला खिचेका फोटो र भिडियो महिलाकै बहिनीको मोबाइलमा पठाइदिन्छन् । महिला उजुरी लिएर ब्यूरोमा पुग्छिन् ।

प्रहरीले कटुवाललाई समेत पक्राउ गरेको छ । उनीविरुद्ध पनि विद्युतीय कारोबार ऐन, २०६३  अन्तर्गत काठमाडौं जिल्ला अदालतबाट पाँच दिनको म्याद थपेर अनुसन्धान गरिरहेको छ ।

ब्यूरोका प्रवक्ता एवं एसपी दीपक राज अवस्थीका अनुसार सामाजिक सञ्जालमा चिनजानकै भरमा प्रेम सम्बन्धमा गाँसिने र सम्बन्धमा खटपट भएपछि अश्लील तस्वीर बाहिर ल्याउने प्रवृत्ति बढ्दो छ  । ब्यूरोमा उजुरी आए अनुसार पीडकलाई कारबाहीको दायरामा ल्याइएको एसपी अवस्थी बताउँछन् ।