०२ साउन २०८३, शनिबार
स्विट्जरल्यान्डको डाभोसमा हुन लागेको वर्ल्ड इकोनोमिक फोरमको दौरान ‘युनिभर्सल पिस फोरम’को घोषणा गरिने भएको छ ।
कपनमा रहेको श्याल्पा गुम्बाका श्याल्पा तेन्जिन रिन्पोछेले युनिभर्सल पिस फोरम घोषणा गर्न लागिएको बिहीबार पत्रकार सम्मेलन गरेर जानकारी दिएका हुन् ।
जनवरी २१ मा स्विट्जरल्यान्डको डाभोसमा हुन लागेको वर्ल्ड इकोनोमिक फोरममा रिन्पोछे सहभागी हुन लागेका छन् ।
वर्ल्ड इकोनोमिक फोरममा गरिने पिस फोरमको घोषणाले बुद्धभूमि नेपालको प्रचार हुने र नेपालले वैदेशिक लगानी भित्र्याउन सक्ने सम्भावना रहेको रिन्पोछेले बताए ।
इकोनोमिक फोरममा ५६ राष्ट्रका प्रमुख र हजारौं व्यवसायीक घरानाका प्रतिनिधि उपस्थित हुनेछन् । फोरममा लुम्बिनीमा बन्न लागेको विश्व शान्ति धामको बारेमा समेत जानकारी गराइने छ । ‘शान्ति धामले सबै किसिमका व्यापारिक घरानाहरूलाई नेपालसँग जोडिने मौका प्राप्त हुनेछ,’ पत्रकार सम्मेलनमा रिन्पोछेले भने ।
जनवरी २१ मा ‘विश्व शान्ति धाम’ को शुभारम्भ गर्ने तयारी छ । ‘लुम्बिनीलाई विश्व शान्ति धाम बनाइसकेपछि देशको विकासका लागि ठूलो योगदान दिन सक्छौ भन्ने लागेको छ । विश्वभरिमा नेपाल यस्तो राष्ट्र हो भनेर हामीले चिनाउने र आफ्नो कुरा राख्न पाउने स्थान पनि यो फोरम हो,' रिन्पोछेले भने, ‘हामी कम्प्युटरको हार्डवेयर जस्तो हौ अब, हामीलाई सफ्टवेयर आवश्यक छ । जुन विश्व शान्ति धामले प्रदान गर्नेछ ।’
विश्व शान्ति धाम केवल नेपालीको लागि मात्र नभई सम्पूर्ण मानव जातिको लागि दिगो विकास र समृद्धिको बाटो खोल्ने उनको भनाइ छ ।
‘विश्व शान्ति धाम एक ऐतिहासिक र समावेशी स्मारक हुनेछ । जहाँ आस्तिक र नास्तिक जे भए पनि प्रत्येक जाति, रङ्ग, धर्म र विश्वासका मानिस आउन सक्नेछन्,' उनले भने, ‘हामीले यसलाई ‘भित्री शान्तिमार्फत विश्व शान्ति’ प्राप्त गर्ने केन्द्रको रूपमा विकास गर्ने परिकल्पना गरेका छौं ।’
हेर्नुहोस्, श्याल्पा रिन्पोछेसँग गरिएको भिडियो अन्तर्वार्ता :
