०८ साउन २०८३, शुक्रबार
मानव बेचबिखन तथा ओसारपसार मुद्दामा इन्टरपोलबाट रेड नोटिस जारी भएका फरार एक व्यक्तिलाई प्रहरीले ओमानबाट पक्राउ गरेर नेपाल ल्याएको छ।
बर्दियाको बढैयाताल गाउँपालिका-२ घर भई काठमाडौं टोखा नगरपालिका-३ बस्ने विनोद पौडेललाई ओमानबाट पक्राउ गरेर ल्याइएको प्रहरीले जनाएको छ।
एनसीबी अबु मस्कट ओमानको समन्वयमा ओमानमा पक्राउ परेका उनलाई सम्बन्धित मुद्दामा कारबाही गर्ने/गराउने प्रयोजनार्थ बुधबार नेपाल फिर्ता ल्याइएको छ ।
मानव बेचबिखन तथा ओसारपसार मुद्दामा संलग्न रही फरार रहेका उनलाई अन्तर्राष्ट्रियस्तरमा खोजतलास एवं पक्राउ गर्नका लागि एनसीबी काठमाडौंको अनुरोधमा इन्टरपोल महासचिवालयबाट पुस १२ गते उनीविरूद्ध रेड नोटिस जारी भएको थियो ।
उनलाई सम्बन्धित कसुर बमोजिम कानूनी कारबाहीका लागि प्रहरीको मानव बेचबिखन अनुसन्धान ब्यूरोलाई बुझाइएको इन्टरपोल शाखाले जनाएको छ ।
