२२ जेठ २०८३, शुक्रबार
फोर नेसन्स इन्टरनेसनल वुमन्स फुटबल च्याम्पियनसिपको उपाधिका लागि घरेलु टोली नेपालले आज म्यानमारसँग प्रतिस्पर्धा गर्दै छ । दशरथ रङ्गशालामा हुने फाइनल खेल साँझ ६ बजेबाट शुरू हुनेछ ।
वरीयतामा नेपालभन्दा ४८ स्थान माथि रहेको म्यानमारसँग नेपालको महिला टोलीले अहिलेसम्म ५ खेल खेले पनि जित्न सकेको छैन । म्यानमारले ३ खेल जित्दा २ खेल बराबरीमा सकिएको थियो ।
हालसम्म उपाधि नजितेको नेपालले १३औँ पटक फाइनल खेल्दै छ । १२औँ पटक फाइनलमा असफल भएको नेपाललाई घरेलु मैदानमा फाइनल जित्दै पहिलो पटक उपाधि जित्ने अवसर छ ।
फिफा वरीयतामा नेपाल १ सय ३ र म्यानमार ५५औँ स्थानमा छन् । प्रतियोगिताको लिग चरणमा नेपाल र म्यानमारले दुई गोलको बराबरी खेलेका थिए ।
प्रतियोगितामा नेपालसहित म्यानमार, लेबनान र कीर्गिस्तान सहभागी थिए ।
