२१ जेठ २०८३, बिहीबार
मोरङको विराटनगरस्थित महेन्द्र मोरङ क्याम्पसमा नेपाली कांग्रेसनिकट विद्यार्थी संगठन नेपाल विद्यार्थी संघको दुई पक्षबीच झडप हुँदा दुई जना विद्यार्थी घाइते भएका छन् ।
सभापति शेरबहादुर देउवा र नेता डा. शेखर कोइराला पक्ष विद्यार्थीबीच झडप भएको हो ।
नेविसंघ मोरङका सभापति सरोज पोखरेल र चुले भाइ भनिने आयुष दाहालसहितको टोली क्याम्पसमा इकाइ समिति गठन र स्ववियु चुनावको भागबन्डाको विषय लिएर गएपछि विवाद भएको थियो ।
इतर समूहले संस्थापन समूहसँग बराबरी भाग खोजेपछि झडप भएको बताइएको छ ।
स्ववियु सभापति समेत रहेका जसवन्त पौडेलसहितका नेताले इतर समूहका नेतामाथि जाइलागेको घटनास्थलमा रहेका एक प्रहरी अधिकृतले बताए ।
स्ववियु सभापति पौडेल देउवा समूहका हुन् । जिल्ला सभापति पोखरेल भने कोइराला समूह हुन् । उनीहरूबीचको झडपमा परेर नेविसंघ सभापति पोखरेल र आयुष दाहाल घाइते भएका छन् । उनीहरूको विराटनगरस्थित नोबेल मेडिकल कलेजमा उपचार भइरहेको छ ।
जसवन्त पौडेल, स्ववियु सचिव एलिस ठकुरी, सदस्य प्रशान्त यादवलगायतको टोली घटनामा संलग्न रहेको बताइएको छ ।
