१३ असार २०८३, शनिबार
रुसी राष्ट्रपति भ्लादिमिर पुटिनले युक्रेनी सैनिकहरूलाई आत्मसमर्पण गर्न आग्रह गरेका छन् ।
उनले रुसको कुर्स्क क्षेत्रमा रहेका युक्रेनी फौजले सर्वसाधारण विरुद्ध अपराध गरिरहेको आरोप समेत लगाएका छन् ।
शुक्रबार सुरक्षा परिषद्को बैठकमा बोल्दै पुटिनले आत्मसमर्पण गर्ने सैनिकहरूको जीवन ग्यारेन्टी गरिएको दाबी गरे ।
साथै, उनले अमेरिका र रुसबीचको सम्बन्ध पुन:स्थापित गर्ने प्रयास भइरहेको बताए ।
'समग्रमा, अवस्था अगाडि बढ्दैछ,' उनले भने, 'हेरौं, के नतिजा आउँछ ।'
यसैबीच, अमेरिका, युक्रेन र रुसबीच युद्धविरामका लागि कूटनीतिक प्रयासहरू जारी छन् ।
यसै हप्ताको शुरूमा युक्रेनी अधिकारीहरूले अमेरिकी प्रस्तावअनुसार ३०- दिन युद्धविराम स्वीकृत गरेका थिए ।
यस प्रस्तावअनुसार सम्पूर्ण युद्धभूमिमा शत्रुता रोक्ने योजना थियो ।
पुटिनले अमेरिकी विशेष दूत स्टिभ विटकोफसँग मस्कोमा भेट गरेपछि अमेरिकी विदेशमन्त्री मार्को रुबियोले यसलाई 'सावधानीपूर्वक आशावादी बन्ने संकेत' भनेका छन् ।
अमेरिकी राष्ट्रपति ट्रम्पले समेत वार्तालाई 'राम्रो र उत्पादनशील' भन्दै युद्ध अन्त्यको सम्भावना रहेको बताएका छन् ।
ट्रम्पले पुटिनसँग कुर्स्क क्षेत्रमा रहेका युक्रेनी सेनालाई जोगाउन आग्रह गरेका थिए ।
पुटिनले पनि त्यसलाई मान्यता दिँदै आत्मसमर्पण गर्ने सैनिकहरूलाई अन्तर्राष्ट्रिय कानुन र रुसी कानूनअनुसार सुरक्षित राखिने बताए ।
यता युक्रेनी राष्ट्रपति भोलोडिमिर जेलेन्स्कीले पुटिनको मनसायमा शंका व्यक्त गरेका छन् ।
उनले अमेरिका र उसका सहयोगी राष्ट्रसँग रुसलाई कडा दबाब दिन आग्रह गरेका छन् ।
'युद्ध शुरू भएको पहिलो दिनदेखि नै हामीले केवल एक कुरा चाहेका थियौं – रुसले हाम्रो भूमि छोडोस् र हाम्रो जनतालाई शान्ति देओस्,' जेलेन्स्कीले आफ्नो एक्स (ट्विटर) पोस्टमा लेखेका छन् ।
जेलेन्स्कीले पुटिनलाई युद्धविराम वार्ता बिथोल्ने प्रयास गरेको आरोप लगाए ।
उनले भने, 'पुटिन यो युद्ध अन्त्य गर्न चाहँदैनन् । त्यसैले उनी असम्भव र कठिन सर्तहरू राखेर वार्तालाई असफल बनाउन खोजिरहेका छन् ।'
यसैबीच, ब्रिटिश प्रधानमन्त्री कीर स्टार्मरले शनिबार युक्रेनलाई समर्थन गर्न युरोपेली र नेटो नेताहरूसँग भर्चुअल बैठक आयोजना गर्ने तयारी गरेका छन् ।
