२१ जेठ २०८३, बिहीबार
अख्तियार दुरुपयोग अनुसन्धान आयोगले भ्रष्टाचार मुद्दामा विशेष अदालतको फैसलाविरुद्ध सर्वोच्च अदालतमा पुनरावेदन गरेको छ ।
आयोगले प्रतिवादी बनाएका कमोद तिवारी, शम्भु साह रौनियार, शिवप्रकाश साह तेली, रिन्ता कुमारी, शेख साजिद एकबाल र शेष सफि अहमदविरुद्ध भ्रष्टाचार निवारण ऐन २०५९ बमोजिम कारबाही हुनुपर्ने माग गर्दै विशेष अदालतमा आरोपपत्र दायर गरेको थियो ।
विशेष अदालतले २०८१ साल असार १६ गते गरेको फैसलामा आंशिक सफाइ दिएको थियो । उक्त फैसलामा चित्त नबुझेर सर्वोच्च अदालतमा पुनरावेदन दर्ता गरिएको आयोगका प्रवक्ता राजेन्द्र कुमार पौडेलले जानकारी दिए ।
आयोगका अनुसार पर्सा जिल्लाको भूमिसुधार तथा मालपोत कार्यालयका प्रमुख कमोद तिवारीले युवा स्पोर्ट्स क्लबको नाममा रहेको जग्गा शेष सफि अहमदको नाममा नामसारी गर्ने निर्णय गरेका थिए ।
सो क्रममा वीरगञ्ज महानगरपालिकाको वडा नं. ३१ बाट सिफारिस लिएको भनिए पनि उक्त सिफारिस नदेखिएको आयोगले जनाएको छ ।
साथै, क्लबको नाममा रहेको जग्गाको अभिलेख मिसिल खरिदार रिन्ता कुमारीले अन्य प्रतिवादीलाई बुझाइ हराउन भूमिका खेलेको भन्दै आयोगले सबैलाई कारबाहीको दायरामा ल्याउनुपर्ने माग गरेको छ ।
