सरकारले नेपाल स्टक एक्सचेन्जको प्रमुख कार्यकारी अधिकृतमा नारद लुइँटेललाई नियुक्त गरेको छ ।

सोमवार बसेको बैठकले लुइँटेललाई सीईओमा नियुक्त गरेको एक मन्त्रीले बताए ।

नेप्सेको सीईओ पदका लागि गठित सिफारिस समितिले आवेदन दिएका १० जनामध्ये चूडामणि चापागाईं, नारदकुमार लुँइटेल, पूर्णप्रसाद आचार्य, बद्रीप्रसाद प्याकुरेल र हेमन्त बस्याललाई सर्टलिस्टमा राखेको थियो ।

बुधवार बिहान अर्थ मन्त्रालयले पाँचै जनालाई कार्ययोजना प्रस्तुति र अन्तर्वार्ताका लागि बोलाएको थियो । 

अर्थ मन्त्रालयले यसअघि फागुन १२ गते सार्वजनिक सूचना जारी गर्दै सीईओ पदका लागि आवेदन मागेको थियो । 

फागुन १८ गतेसम्म आवेदन नपरेपछि समय थपेर फागुन २५ सम्मको समयसीमा तोकिएको थियो । अन्तिम दिनसम्म १० जनाले आवेदन दिएका थिए ।

आवेदन दिने अन्य प्रतिस्पर्धीहरूमा युवराज दाहाल, प्रवीण अधिकारी, विमलकुमार तिवारी, कृष्णबहादुर कार्की र मुकुन्दराज जोशी थिए ।

यसअघि सीईओ रहेका कृष्णबहादुर कार्कीको कार्यकाल सकिएपछि गत माघदेखि नेप्सेको प्रमुख कार्यकारी अधिकृत पद रिक्त रहेको थियो ।