२१ असार २०८३, आइतबार
भक्तपुरको मध्यपुर ठिमी नगरपालिका-९, बोडे निलबाराहीस्थित पिकनिक स्पटको पार्किङस्थलमा मृत भेटिएका ६६ वर्षीय ओम प्रकाश राईको हत्या गरेको आरोपमा एक पुरुष पक्राउ परेका छन् ।
पक्राउ पर्नेमा रोल्पाको परिवर्तन गाउँपालिका-६ घर भएका ५७ वर्षीय हिमाल बुढामगर रहेका छन् । उनले ढुंगाले प्रहार गरी राईको हत्या गरेको खुलेको प्रहरीले जनाएको छ।
खोटाङको केपिलासगढी गाउँपालिका-२ घर भई हाल बोडे बस्ने ६६ वर्षीय राई मृत अवस्थामा फेला पर्दा उनको दायाँ कानछेउ र टाउकोमा चोट लागेको थियो।
बुढामगरलाई पक्राउ गरी भक्तपुर जिल्ला अदालत भक्तपुरबाट पाँच दिनको म्याद थप लिई अनुसन्धान अघि बढाइएको जिल्ला प्रहरी परिसर भक्तपुरका सूचना अधिकारी,डीएसपी ढुण्डीराज नेउपानेले जानकारी दिए।
