राजावादी समूहरू सक्रिय भएपछि समाजवादी मोर्चाले काउन्टर दिनेगरी आज काठमाडौं केन्द्रित प्रदर्शन गर्दैछ ।

काठमाडौंको भृकुटीमण्डपमा मोर्चाले विशाल जनसभा गर्न लागेको हो । मोर्चाले अहिले सभागृह अगाडिको मुख्य सडकमै स्टेज निर्माण गरिरहेको छ । 

मोर्चाको सभा हुने स्थानमा बिहानैदेखि सवारी साधन डाइभर्ट गरिएको छ ।

मोर्चामा संलग्न ४ दलमध्ये नेकपा माओवादी केन्द्रले ४ ठाउँबाट प्रदर्शन गर्दैछ भने माधवकुमार नेपाल नेतृत्वको नेकपा एकीकृत समाजवादीले दुई ठाउँ र नेत्रविक्रम चन्द नेतृत्वको नेकपा र महेन्द्रराय नेतृत्वको नेपाल समाजवादी पार्टीले एक एक ठाउँबाट प्रदर्शन गर्नेछन् ।

जसअनुसार माओवादी केन्द्रले बबरमहल, कुपण्डोल, त्रिपुरेश्वर, सोह्रखुट्टेबाट जुलुस प्रदर्शन गर्नेछ भने एकीकृत समाजवादीले मैतिदेवी डिल्लीबजार हुँदै आउनेछ । उता, चन्द नेतृत्वको नेकपाले सुन्धाराबाट प्रदर्शन गर्नेछ भने नेसपाले न्युरोड गेटबाट प्रदर्शन गर्नेछन् ।

दिउँसो १ बजेबाट शुरू हुने जुलुस प्रदर्शनी मार्गमा पुगेर सभामा परिणत हुनेछ। 

यसैगरी आजै राजावादी समूहले पनि काठमाडौंको तीनकुनेमा सभा गर्दै छ ।