२८ जेठ २०८३, बिहीबार
जिल्ला प्रहरी परिसर काठमाडौंको हिरासतमा अहिले बहालवाला सांसद एवं राप्रपाका महामन्त्री धवल शमशेर राणा, राप्रपाकै वरिष्ठ उपाध्यक्ष रवीन्द्र मिश्रलगायत झन्डै सय जना थुनुवा छन् ।
गत शुक्रबार तीनकुनेमा भएको हिंसात्मक प्रदर्शनमा जोडिएका राणा, मिश्रलगायत ४१ जनाविरुद्ध प्रहरीले तीनवटा कसुरमा अनुसन्धान थालेको छ । बाँकी अन्य केसका हुन् ।
राज्य विरुद्धको कसुर, संगठित अपराध र आपराधिक उपद्रव कसुरमा अनुसन्धान गर्न प्रहरीले काठमाडौं जिल्ला अदालतबाट आइतबार मात्रै ५ दिनको म्याद लिएको छ ।
शुक्रबार प्रदर्शनका क्रममा घाइतेलाई भेट्न केएमसी अस्पताल पुगेर फर्कँदै गर्दा मिश्र र राणालाई प्रहरीले पक्राउ गरेको थियो । काठमाडौं उपत्यका अपराध अनुसन्धान कार्यालयबाट गएको टोलीले ‘हजुरहरूलाई उठाउन निर्देशन छ, गाडी चढौं हजुर’ भन्दै गाडीभित्र राख्यो ।
उनीहरूले गाडीमा बस्दै गर्दा ‘हामीले मान्छे मारेका हौं र ? के कसुरमा पक्राउ गर्न आउनुभएको ?’ भनेर प्रतिप्रश्न गरेका थिए । प्रहरीले जरुरी पक्राउ पुर्जी देखाएर नियन्त्रणमा लिएको थियो ।
शुरूमा अपराध अनुसन्धान कार्यालयको टेकुस्थित कार्यालयमा पुर्याइएका उनीहरूलाई मध्यराति भद्रकालीस्थित परिसरमा पुर्याई हिरासतमा राखिएको थियो ।
परिसरको हिरासतमा पुगेपछि मिश्रले ‘यहाँ पनि आउन लेखेको रहेछ’ भन्दै ठट्टा गरेका थिए । राणाले ‘राजनीति गरेपछि यो सामान्य हो’ भनेर प्रतिक्रिया जनाए ।
भोलिपल्ट शनिबार राप्रपाका अध्यक्ष राजेन्द्र लिङ्देन, पशुपति शमशेर जबरालगायत नेताहरू मिश्र र राणालाई भेट्न पुगे । शुरूमा मिश्र र राणालाई परिसरका प्रमुख एसएसपी विश्व अधिकारीकै च्याम्बरमा भेट्न दिने कि भनेर प्रहरीले सल्लाह गरेको थियो । तर, यसो गर्दा बाहिर गलत सन्देश जाने र थुनुवालाई एकै व्यवहारले हेर्नुपर्ने भन्दै प्रहरीले सुझबुझका साथ थुनुवा कक्षअगाडि रहेको भेटघाट कक्षमै भेट्ने प्रबन्ध मिलाइदियो ।
लिङ्देनले मिश्र र राणालाई थम्थम्याउँदै भने, ‘कांग्रेस–एमालेले राजनीतिक प्रतिशोध साँधे, हामी संसद् र सडकमा सशक्त प्रतिवाद गर्छौं ।’
‘उनले हिरासतमा बस्दा खानपानको व्यवस्था के हुन्छ ?’ भनेर प्रहरीलाई सोधेका थिए ।
‘घटनामा उहाँहरूको प्रत्यक्ष संलग्नता होइन, राजनीतिक प्रतिशोध साँधिएको हो, हिरासतमा बस्दा दुर्व्यवहार नगरिदिनुहोला, स्वास्थ्यको ख्याल गरिदिनुहोला’ भन्दै लिङ्देनलगायत नेताहरू फर्किए ।
विशेष अवस्थाबाहेक प्रहरीले थुनुवालाई बिहान ७ बजेदेखि ९ बजेसम्म र दिउँसो ३ बजेदेखि साँझ ६ बजेसम्म मात्र आफन्तसँग भेट्न दिँदै आएको छ ।
मिश्र र राणाले थुनुवालाई खुवाइने खाना खाएका छन् । सोमबार दलका नेता नपुगे पनि मिश्र र राणाको परिवारका सदस्यहरू उनीहरूलाई भेट्न पुगेका छन् ।
प्रहरी स्रोतका अनुसार भेट्न आउने राजनीतिक व्यक्तिहरूसँग उनीहरूले आफूहरूमाथि ज्यादती गरिएको गुनासो गर्ने गरेका छन् । परिवारका सदस्य आउँदा भने छिट्टै छुट्ने आश्वासन दिने गरेको एक प्रहरी अधिकृतले बताए ।
प्रहरीका अनुसार धर्मगुरु भनिने पुष्कर खतिवडालाई पनि उनको अनुयायी भन्दै केही भेट्न पुगेका छन् । खतिवडाले ढुंगाले प्रहरीलाई हानेको भिडियो भाइरल भएको थियो ।
प्रदर्शनस्थलबाट भागेका दुर्गा प्रसाईं अन्तिममा खतिवडाकै घर पुगी फलफूल खाएर बाहिरिएको खुलेको छ । मिश्र र राणालाई शुक्रबारै प्रहरीले नियन्त्रणमा लिए पनि खतिवडालाई भने शनिबार बिहान मात्रै पक्राउ गरिएको थियो ।
खतिवडालाई म्याद थपका लागि अदालतमा लैजाँदा परिसरमा पुगेका अन्य सेवाग्राहीले ‘ढुंगा हान्ने गुरु यिनै हुन्’ भन्दै हाँसो गरेका थिए । परिसरका प्रवक्ता एसपी अपिलराज बोहराका अनुसार मिश्र र राणालाई अन्य थुनुवासरह नै व्यवहार गरिएको छ ।
उनले भने, ‘उहाँहरूलाई कुनै विशेष सुविधा दिइएको छैन । सबैलाई एकै ठाउँमा राखिएको छैन । कोठाहरूमा मिलाएर राखिएको छ ।’
थुनुवा भेट्ने समय तालिकामा आफन्त र पार्टीका नेताहरू आएको अवस्थामा मिलाएर भेट्न दिइएको जानकारी बोहराले दिए ।
