नेकपा (एकीकृत समाजवादी) कोशी प्रदेशको अध्यक्षमा सरिता खड्का निर्वाचित भएकी छन् । 

खड्का यसअघि प्रदेश कमिटीको उपमहासचिव थिइन् भने उनी पूर्वप्रदेशसभा सदस्य पनि हुन् । अधिवेशन उद्घाटन भएको तेस्रो दिनपछि एसले नयाँ कार्यसमिति चयन गरेको हो । 

उपाध्यक्ष भने चयन गरिएको छैन । दुई उपाध्यक्ष रहने पार्टीको विधानमा उल्लेख भएपनि अधिवेशनले छानेको छैन । तर, केन्द्रीय उपमहासचिव राजेन्द्र राईले भने उपाध्यक्ष चुनिसकेको दाबी गरे । 

‘सहमितमै दुई उपाध्यक्ष छानिसकिएको छ’, उपमहासचिव राईले भने ‘तर, उहाँहरू हलभन्दा बाहिर रहेकाले नाम घोषणा नगरिएको हो  ।’ 

यस्तै, सचिवमा दलशेर राई निर्वाचित भएका छन् । तीन उपसचिवमध्ये एक जना भने पछि छान्नेगरि दुई जना सर्वसम्मत  छानिएका छन् । महिला उपसचिव भने खाली छोडिएको छ । 

आदिवासीतर्फ ताप्लेजुङको जिल्ला समन्वय समितिका प्रमुख समेत रहेका छिरिङ लामा र दलिततर्फ उमा शंकर निर्वाचित भएका छन् । अधिवेशन मंगलबार इटहरीमा शुरू भएको थियो ।

पार्टी फुटेपछिको नेकपा एसको यो पहिलो प्रदेश अधिवेशन हो । अधिवेशनले १६८ सदस्यीय नयाँ नेतृत्व चयन गरेको छ । 

प्रदेश अधिवेशनमा पनि सहमतिका नाममा जिल्ला अधिवेशनजस्तै प्रतिनिधिलाई कोठामा बन्धक बनाएर केन्द्रीय नेतृत्वले नाम घोषणा गरेको भन्दै आधाभन्दा बढी प्रतिनिधि रुष्ट बनेका छन् ।