११ साउन २०८३, सोमबार
राजधानीको तीनकुनेमा चैत १५ गते भएको प्रदर्शनमा हिंसा भड्काएको आरोप लागेका दुर्गा प्रसाईं पक्राउ परेका छन् । राष्ट्र, राष्ट्रियता, धर्म संस्कृति तथा नागरिक बचाउ महाभियानका संयोजक प्रसाईं उक्त घटनापछि भारततर्फ भागेका थिए ।
उनलाई भारतबाटै पक्राउ गरिएको प्रहरी उच्च स्रोतले बतायो । 'दुर्गा प्रसाईलाई नियन्त्रणमा लिएर काठमाडौँ ल्याउँदैछ। प्रहरीको विशेष टोलीले आजैलाई नियन्त्रणमा लिएको हो', स्रोतले भन्यो ।
तीनकुनेमा भएको प्रदर्शनमा उनले आन्दोलनकारीलाई उत्तेजित बनाउँदै प्रहरीलाई नै किच्ने शैलीमा गाडी दौडाएका थिए । सो लगत्तै दोहोरो झडप र गोली चलेको थियो भने पछि आन्दोलनकारी तोडफोड, आगजनी र लुटपाटमा संलग्न भएका थिए ।
घटनालगत्तै भागेका उनलाई प्रहरीले घटनाको १२ दिनपछि पक्राउ गर्न सफल भएको हो ।
बुधबारमात्रै प्रसाईंले आफू बाध्यताले भाग्नुपरेको दाबी गरेका थिए । एक भिडियो सन्देशमार्फत उनले हजार माइलको यात्रा पनि शून्यबाट सुरु हुने बताउँदै भिजन भनेको एउटा व्यक्तिबाट सुरु हुने जिकिर गरेका थिए । ‘एउटै व्यक्तिबाट विचार बन्ने हो । आज दुर्गा प्रसाईँ एक व्यक्ति मात्र होइन । घर घर दुर्गा, हर हर दुर्गा बनेको छ । दुर्गा भनेको विचार हो,’ उनले भनेका थिए ।
उनले आफू भागेको नभएर यो मुद्दामा जोगिएको मात्र बताएका थिए । ‘म जोगिए भने मात्र यो जनविद्रोह सफल हुन्छ,’ उनले भनेका थिए, ‘म रहिन भने यो जनविद्रोह दबाएर जान्छ । किनभने पेरुमा जब गोन्जालोलाई पक्रेर मारियो, त्यसपछि पेरुको जनविद्रोह सकियो । म पेरु गोन्जालो बन्न चाहन्न । नेपालीहरूको नेता बन्न चाहन्छु । नेपालीलाई बचाउन चाहन्छु ।’
तीनकुने घटना हिंसात्मक भएपछि प्रहरीले राप्रपाका नेताद्वय धवलशमशेर राणा र रवीन्द्र मिश्रसहित दर्जनौँलाई यसअघि नै पक्राउ गरिसकेको छ ।
