२३ जेठ २०८३, शनिबार
नेकपा एमालेले भौतिक पूर्वाधार तथा यातायात मन्त्री देवेन्द्र दाहाललाई २५ बुँदे सुझाव दिएको छ ।
एमालेले आगामी आर्थिक वर्षको नीति तथा कार्यक्रम एवं बजेटमा समावेश गर्ने विषयमा मन्त्री दाहाललाई २५ बुँदे सुझाव दिएको हो ।
शनिबार पार्टी कार्यालय च्यासलमा पार्टीको भौतिक पूर्वाधार तथा यातायात विभागले गरेको कार्यक्रममा सरकारको कामलाई प्रभावकारी बनाउन पार्टीको तर्फबाट सुझाव दिएको विभागीय प्रमुख गोकर्ण विष्टले जानकारी दिए ।
एमालेले सडक विभाग, यातायात व्यवस्था विभाग, रेल विभाग तथा पानी जहाज कार्यालयसँग सम्बन्धित विभिन्न विषयहरू समेटेर लिखित सुझाव दिएको छ ।
योजना तथा कार्यक्रमहरूलाई नागरिकसम्म प्रभावकारी रुपमा पुर्याउन सरकारको नीति था कार्यक्रम एवं बजेटमा समावेश गर्नु पर्ने विषयहरू प्राथमिकताका साथ समेटेर सुझाव दिइएको विष्टले बताए ।
राष्ट्रिय गौरवका तथा राष्ट्रिय महत्वका आयोजनाहरू, विकट तथा दुर्गम क्षेत्र, रणनीतिक महत्वका योजना, आर्थिक विकास र रोजगारी सिर्जनाहरू योजना लगायतलाई नीति कार्यक्रम तथा बजेटमा समावेश गर्न एमालेको सुझाव छ ।
कार्यक्रममा एमालेका पोलिटब्युरो सदस्यसमेत रहेका मन्त्री दाहालले पार्टीले अल्पकालीन तथा दीर्घकालिन आवश्यकताहरूलाई सम्बोधन हुने गरी महत्त्वपूर्ण सुझाव दिएको बताए । आगामी वर्षको बजेटमा निर्माणाधीन तथा अधुरा योजनाहरू पूरा गराउन प्राथमिकता दिइने मन्त्री दाहालले बताए ।
