०७ साउन २०८३, बिहीबार
नेकपा एमालेका महासचिव शंकर पोखरेलले विपक्षी दलले केपी शर्मा ओली नेतृत्वको सरकारको आलोचना गर्ने समय बल्ल आउन लागेको बताएका छन् ।
अहिलेसम्म माओवादी सम्मिलित सरकारले ल्याएको नीति कार्यक्रम र बजेट कार्यान्वयन गर्ने मात्र काम भएको उनको भनाइ छ ।
एमाले निकट पत्रकारको संस्था प्रेस चौतारी नेपालको केन्द्रीय कमिटी बैठकलाई शुक्रबार राजधानीमा सम्बोधन गर्दै पोखरेलले सरकारको आलोचना गर्ने समय बल्ल आउन लागेको बताएका हुन् ।
‘सरकारले अहिलेसम्म के नराम्रो काम गर्यो र आलोचना गर्ने ? सरकारका नीति तथा कार्यक्रम आएपछि प्रतिपक्षले आलोचना गर्ने समय बल्ल आउँदैछ । अहिलेसम्म माओवादी सम्मिलित सरकारले ल्याएको कार्यक्रम कार्यान्वयन गरिराखेको छ,’ पोखरेलले भने ।
एमालेको नेतृत्वलाई बदनाम गर्नको अनेकन तथ्यहीन कूप्रचार गरिएको पोखरेलले दावी गरे । ‘कम्बोडियाको टेलिकममा लगानी भनेर यति ज्यादा हल्ला मच्चाइयो । जबकि गभर्मेन्ट होल्डिङ कम्पनी हो, त्यहाँ कसरी लगानी अपारदर्शी हुन्छ ?,’ पोखरेलले भने, ‘त्यसको लगानीकर्ता नेपालको प्रधानमन्त्री भएको तथ्य फेला पारेको भए दुर्गा प्रसाईंले सार्वजनिक गर्नु पर्थ्यो ? सीएनन र बीबीसीको हेडलाइन बन्थ्यो नि !’
