‘लोकान्तर राउण्ड अप’मा पाठकवृन्दलाई स्वागत छ । सधैँझैँ आज पनि हामी बितेको २४ घण्टाका मुख्यमुख्य घटनाक्रमसहित उपस्थित भएका छौँ–

सर्वोच्च अदालतका कर्मचारीको किर्ते पत्रका आधारमा नागरिक उन्मुक्ति पार्टीका संरक्षक रेशम चौधरी बुधबार अनाहकमा करिब ५ घण्टा कारागार चलाउन हुनुपरेको छ । टीकापुर घटनामा दोषी ठहर भएको र सर्वोच्चको फैसला कार्यान्वयन गर्नु भनेर सर्वोच्चकै कर्मचारी महिमान सिंह विष्टको फर्जी पत्रका आधारमा प्रहरीले बुधबार उनलाई पक्राउ गरेको थियो । उक्त पत्र अनधिकृत रहेको पुष्टि भएसँगै उनी बुधबार साँझ नै डिल्लीबजार कारागारबाट रिहा भए । 

नागरिक उन्मुक्ति पार्टी र जनमत पार्टीबीच हुने भनिएको एकता घोषणाको ठिक अघि उनी कार्यक्रम तय भएको प्रज्ञा भवन नजिकैबाट पक्राउ परेका हुन् । उनी पक्राउ परेसँगै कार्यक्रम नै भाँडिन पुग्यो । यद्यपि नेताहरुले पुनः छलफल गरेर एकता गर्ने बताएका छन् । 

००००

यसैबीच चौधरीलाई पक्राउ गर्न पत्राचार गर्ने सर्वोच्च अदालतका अधिकृत पक्राउ परेका छन् ।

 शाखा अधिकृत महिमानसिंह विष्टलाई पक्राउ गरेर भद्रकालीस्थित जिल्ला प्रहरी परिसरमा राखिएको छ । सर्वोच्च अदालतले विज्ञप्तिमार्फत उक्त पत्र फर्जी भएको स्पष्ट गरिसकेको छ । 

००००

जनमत पार्टीका अध्यक्ष डा सीके राउतले पार्टी एकता भाँड्नका लागि घोषणास्थलबाट रेशम चौधरी पक्राउ पर्नु गम्भीर षडयन्त्र भएको आरोप लगाएका छन् । उनले यसलाई कर्मचारीको त्रुटि भन्दा पनि षडयन्त्रको रूपमा लिएको बताए ।

सर्वोच्च अदालतका एक कर्मचारीले लेखेको फर्जी पत्रले केही घण्टा जेल पुगेका रेशम चौधरीलाई रिहा गराउन डिल्लीबजार कारागार पुगेका राउतले पार्टी एकता भाँड्नकै लागि पक्राउ गरिएको आरोप लगाएका हुन् । 

००००

सर्वोच्च अदालतले ६५ वर्षमाथिका व्यक्तिलाई गभर्नर नियुक्त नगर्न यसअघि दिएको अन्तरिम आदेशलाई निरन्तरता दिएको छ ।

न्यायाधीशद्वय तिलप्रसाद श्रेष्ठ र बालकृष्ण ढकालको इजलासले बुधबार यसअघिकै अल्पकालीन अन्तरिम आदेशलाई निरन्तरता दिएको हो ।

यसअघि न्यायाधीश नित्यानन्द पाण्डेको एकल इजलासले ६५ वर्ष नाघेका व्यक्तिलाई अर्थमन्त्रालय सम्बद्ध निकायमा नियुक्त गर्न मिल्ने गरी जारी गरिएको मापदण्ड कार्यान्वयन नगर्न अन्तरिम आदेश दिएको थियो ।

००००

प्रधानमन्त्री केपी शर्मा ओलीसमक्ष नेकपा एकीकृत समाजवादीले मुलुकको आर्थिक, सामाजिकलगायत क्षेत्रमा सुधारका लागि आज मागपत्र बुझाएको छ ।

प्रधानमन्त्री निवास, बालुवाटारमा प्रधानमन्त्री ओलीलाई भेटेर सो पार्टीका अध्यक्ष एवं पूर्वप्रधानमन्त्री माधवकुमार नेपालसहितका पदाधिकारीले मागपत्र बुझाएका हुन् ।

००००

राष्ट्रिय स्वतन्त्र पार्टी (रास्वपा)ले जनयात्रा मूल समितिको उपसंयोजकको जिम्मेवारी डा तोसिमा कार्कीलाई दिएको छ ।

पार्टीको जनयात्रा मूल समितिको बुधबार बसेको बैठकले डा कार्कीलाई (उपसंयोजक), कमल सुवेदीलाई (सचिव) र निशा डाँगीलाई (प्रवक्ता)को जिम्मेवारी तोकेको हो ।

००००

ऊर्जा, जलस्रोत तथा सिँचाइ राज्यमन्त्रीमा खमबहादुर गर्बुजा नियुक्त भएका छन् ।

प्रधानमन्त्री केपी शर्मा ओलीको सिफारिसमा राष्ट्रपति रामचन्द्र पौडेलले गर्बुजालाई ऊर्जा राज्यमन्त्रीमा नियुक्त गरेका हुन् ।

००००

सरकारको आगामी आर्थिक वर्षको नीति तथा कार्यक्रम पारित भएको छ । बुधवार प्रधानमन्त्री निवास बालुवाटारमा बसेको मन्त्रिपरिषद् बैठकले नीति तथा कार्यक्रम पारित गरेको सरकारको प्रवक्ता तथा सूचना तथा सञ्चार प्रविधिमन्त्री पृथ्वीसुब्बा गुरुङले जानकारी दिए ।

००००

नेपाल आयल निगमले पेट्रोलियम पदार्थको मूल्य घटाएको छ । निगम सञ्चालक समितिको बुधवार बसेको बैठकले पेट्रोल, डिजेल र मट्टितेलका साथै हवाई इन्धनको मूल्य घटाएको हो । 

निगमका अनुसार पेट्रोलको मूल्य प्रतिलिटर २ रुपैयाँ घटेको छ भने डिजेल र मट्टितेलको मूल्य १ रुपैयाँ घटेको छ । यस्तै हवाई इन्धन आन्तरिकतर्फ प्रतिलिटर ४ रुपैयाँ र अन्तर्राष्ट्रियतर्फ २९ डलर प्रतिकिलो लिटर घटाइएको छ ।

००००

सरकार र आन्दोलनरत नेपाल शिक्षक महासंघबीच ९ बुँदे सहमति भएसँगै शिक्षक आन्दोलन हाललाई स्थगित भएको छ ।

 शिक्षकहरूको प्रमुख माग विद्यालय शिक्षा विधेयक असार १५ गतेभित्र संसदबाट पारित गर्नेगरी दुई पक्षबीच समझदारी भएको छ । त्यसका लागि सत्तारुढ दलका प्रमुख सचेतक र शिक्षा समितिका सभापतिले लिखित प्रतिबद्धता जनाएसँगै शिक्षक आन्दोलन हाललाई स्थगित भएको हो । उधारोमा सहमति भएसँगै २९ दिनदेखिको शिक्षक आन्दोलन हाललाई थामथुम भएको छ । 

००००

नेपाल स्टक एक्सचेन्ज (नेप्से) परिसूचकमा लगातार तेस्रो दिन बुधबार पनि गिरावट देखिएको छ ।

बुधबार नेप्से परिसूचक ८ दशमलव १४ अङ्कले घटेर दुई हजार छ सय २३ दशमलव ८३ को विन्दुमा कायम भएको हो ।

००००

प्रधानमन्त्री केपी शर्मा ओलीले जनताको सङ्घर्षबाट वर्तमान लोकतन्त्र प्राप्त भएसँगै राजतन्त्र अन्त्य भएकाले अब राजतन्त्र कहिल्यै नफर्किने बताएका छन् ।

राष्ट्रिय जनसांस्कृतिक महासङ्घ नेपालको नवौं राष्ट्रिय महाधिवेशनको आज उद्घाटन गर्दै नेकपा एमालेका अध्यक्षसमेत रहेका प्रधानमन्त्री ओलीले गणतन्त्र आइसक्दा पनि स्वतन्त्र हुन नचाहेर ‘रैती हुन पाऊँ’ भन्नेहरूको समूहले व्यवस्थाको विरोध गर्ने र वर्तमान व्यवस्थामा नकारात्मकता देख्ने गरेका बताए ।

००००

प्रहरी नायब महानिरीक्षकबाट प्रहरी अतिरिक्त महानिरीक्षक पदमा पदोन्नति भएका ६ जना प्रहरी अधिकारीहरूले दज्र्यानी चिह्न पाएका छन् ।

बुधबार प्रहरी महानिरीक्षक दीपक थापाले प्रहरी प्रधान कार्यालयमा आयोजित औपचारिक समारोहमा उनीहरूलाई दज्र्यानी चिह्न प्रदान गरेका हुन् ।

००००

स्वास्थ्य तथा जनसङ्ख्या मन्त्रालयले उपचारमा संलग्न सबै सरकारी चिकित्सकहरूलाई कागजातमा आफ्ना सबै विवरण खुलाउन निर्देशन जारी गरेको छ ।

मन्त्रालयको गुणस्तर मापन तथा नियमन महाशाखाले सबै सङ्घीय अस्पताल तथा प्रतिष्ठानहरूलाई पत्राचार गर्दै अस्पतालमा उपचारका लागि आउने बिरामीको रिपोर्टमा चिकित्सकको विवरण खुलाउन भनेको हो ।