दुई जना महिला सांसद धुरुधुरु रुन थालेपछि नेपाली कांग्रेस संसदीय दलको बैठकमा एकछिन सन्नाटा छाएको छ । समसामयिक विषयमा छलफल गर्न शनिवार बसेको बैठकमा सांसदद्वय माया राई र मञ्जु खाण धुरुधुरु रोएका हुन् । 

काठमाडौँमा रहेको स्वर्णलक्ष्मी सहकारी ठगी प्रकरणमा पक्राउ परेर अदालतको आदेशले धरौटीमा छुटेकी सांसद राई रोएपछि खाणपनि रोएकी थिइन् । 

 सांसद राई सहकारी ठगीमा आफ्नो कुनै संलग्नता नरहेको तर अन्यायपूर्वक आफूलाई पक्राउ गरिएको दाबी गर्दै रोएकी हुन् । 

‘राई थरकै एकजनाले समितिमा बस्न आग्रह गरेपछि म सहकारी सञ्चालक समितिमा बसेकी हुँ, तर आर्थिक कारोबारमा मेरो कुनै संलग्नता थिएन’, राईले रुँदै भनिन् । बैठकमा सहभागी एक सांसदका अनुसार सहकारी ठगी सम्बन्धी संसदीय छानबिन समितिले आफूलाई दोषी नदेखाएको समेत उनले दाबी गरेकी थिइन् ।

‘सहकारीको पैसा ग्यालेक्सी टिभीमा गएको छ, जुन टिभी उद्घाटनमा हाम्रै पार्टीका सभापति शेरबहादुर देउवा, अहिलेका प्रधानमन्त्री केपी शर्मा ओली लगायतका शीर्ष नेताहरू पनि पुग्नु भएको थियो । के त्यो बेला उहाँहरूलाई सहकारी ठगी हुँदैछ भन्ने थाहा थियो र ?’ सांसद राईले संसदीय दलको बैठकमा भनेकी थिइन् । 

सहकारी ठगी अनुसन्धानको सिलसिलामा गत वैशाख १२ गते पक्राउ परेकी राई वैशाख ३१ गते धरौटी तिरेर रिहा भएकी थिइन् । लेखा समिति सभापति ऋषिकेश पोखरेलकी पत्नी एक दिनमै रिहा भएको तर आफूलाई विना कारण १७ दिन थुनिएको उनले गुनासो गरिन् ।

राई रोएलगत्तै अर्की सांसद मञ्जु खाण रुन थालेकी थिइन् । उनले आफूलाई बालकृष्ण खाणकी पत्नी भन्दै नक्कली भुटानी शरणार्थी प्रकरणसँग जोडेर अपमान गरिएको गुनासो गरेकी थिइन् ।

‘मर्ला  बालकृष्णकी श्रीमती भन्छन्, शरणार्थीकी श्रीमती भन्छन् । बाटो समेत लुकेर हिँड्नु पर्छ’ खाणले रुदै भनिन्, ‘मेरो पार्टीमा लगानी छ, टिकट दिनुभयो भने म सिराहाबाट पनि चुनाव जितेर आउन सक्छु ।’

त्यसपछि सभापति एवं संसदीय दलका देउवाले जङ्गिँदै ‘तपाईं खाणको श्रीमती नभए के हो त ?’ भनेर प्रश्न गरेका थिए । देउवाले जवाफ फर्काएपछि मञ्जु रुन छाडेको ती सांसदले लोकान्तरलाई जानकारी दिए । 

शनिवारको संसदीय दलको बैठकमा बोल्ने सांसदहरूले नेपाल राष्ट्र बैंकको गभर्नर नियुक्तिमा भएको ढिलाइबारे चासो राखेका थिए । 

बैठकमा सभापति शेरबहादुर देउवाले बाहिर चर्चा गरिएजस्तो सत्ता गठबन्धनमा समस्या नरहेको बताएका थिए ।