१० साउन २०८३, आइतबार
अमेरिकी राष्ट्रपति डोनाल्ड ट्रम्पले १२ देशका नागरिकलाई अमेरिका यात्रामा पूर्णप्रतिबन्ध लगाउने कार्यकारी आदेशमा हस्ताक्षर गरेका छन् । यात्रा प्रतिबन्धको निर्णय ९ जुनदेखि लागू हुने फक्स न्युजले जनाएको छ ।
सुरक्षा जोखिमलाई कारण देखाउँदै ट्रम्पले अफगानिस्तान, म्यानमार (बर्मा), चाड, गणतन्त्र कंगो, इक्वेटोरियल गिनी, इरिट्रिया, हैटी, इरान, लिबिया, सोमालिया, सुडान र यमनका नागरिकलाई अमेरिका यात्रामा पूर्ण प्रतिबन्ध लगाउने निर्णय गरेका हुन् ।
यसैगरी बुरुन्डी, क्युबा, लाओस, सिएरालियोन, टोगो, तुर्कमेनिस्तान र भेनेजुएलाका नागरिकहरूलाई आंशिक रूपमा प्रतिबन्ध लगाउने घोषणामा पनि हस्ताक्षर गरेका छन् ।
यद्यपि, अमेरिकी ग्रिनकार्ड भएका व्यक्ति, ९ जुनभन्दा अघि नै भिसा लागिसकेका व्यक्ति, केही निश्चित भिसा श्रेणीहरू र अमेरिकी राष्ट्रिय हितमा सेवा गर्ने व्यक्तिहरूलाई भने छुट दिइने सीएनएनको समाचारमा उल्लेख छ ।
ह्वाइट हाउसका एक अधिकारीका अनुसार कोलोराडोको बोल्डरमा भएको यहूदी विरोधी आक्रमणपछि राष्ट्रपतिले यो घोषणामा हस्ताक्षर गरेका हुन् । उनी पहिले नै यसबारे विचार गरिरहेका थिए, तर आइतबारको आक्रमणले यसलाई छिटो गतिमा ल्याएको समाचारमा उल्लेख छ ।
आफ्नो पहिलो कार्यकालमा ट्रम्पले सात बहुसंख्यक मुस्लिम राष्ट्रहरूका यात्रुहरूलाई अमेरिका आउनबाट रोक लगाएका थिए, जुन नीतिलाई अदालतले चुनौती दिएको थियो र राष्ट्रपति जो बाइडेनले २०२१ मा पदभार ग्रहण गर्दा यसलाई खारेज गरेका थिए ।
