संघीय संसद्को लेखा समिति सभापति एवं एमाले सांसद ऋषिकेश पोखरेलकी श्रीमती अञ्जला कोइराला जोडिएको मोरङको उमागौरी सहकारी ठगी प्रकरणको मुद्दाको पेशी चौथो पनि पटक स्थगित भएको छ ।

उच्च अदालत विराटनगरका न्यायाधीश विष्णुप्रसाद अर्यालको इजलासमा बिहीबार तोकिएको पेशी प्रतिवादीका कानून व्यवसायीले निवेदन दिएपछि स्थगित भएको हो । यसअघि तीन पटक यो मुद्दाको पेशी सरेको थियो ।

पहिले उच्च अदालतका कार्यवाहक मुख्य न्यायाधीश ध्रुवराज नन्दको इजलासमा दुई पटक पेशी तोकिएको थियो । प्रतिवादीका कानून व्यवसायीले निवेदन दिएपछि ती पेशीहरू स्थगित भएका थिए । मोरङ जिल्ला अदालतको निर्णयविरुद्ध सरकारी वकिलको कार्यालयले अञ्जलासहित ६ जना प्रतिवादीलाई थुनामा राखेर मुद्दा चलाउनुपर्ने माग राख्दै निवेदन दिएको थियो ।  

वैशाख ११ मा उच्च अदालत विराटनगरका न्यायाधीशद्वय श्रीधराकुमारी पुडासैनी र केशवप्रसाद बास्तोलाको राय बाझिएको थियो । अञ्जलासहित ६ प्रतिवादीको हकमा दुवै न्यायाधीशबीच धरौटी रकम बढाउने कि नबढाउने भन्ने विषयमा राय बाझिएको थियो । 

न्यायाधीश बास्तोलाले प्रतिवादीमध्ये रोशन राजवंशी, अञ्जला कोइराला, ज्योति बास्कोटा र सन्तलाल खवासको हकमा जनही १ करोड र अन्य प्रतिवादीहरू लक्ष्मीदेवी कार्की राजवंशी, सुमन लोहनी तथा मनोजकुमार सोनीको हकमा जनही २५ लाख रुपैयाँ धरौटी माग गर्ने राय पेश गरेका थिए ।

तर, न्यायाधीश पुडासैनीले जिल्ला अदालत मोरङले गरेको आदेशलाई सदर गरेकी छिन् । जिल्ला अदालतले अञ्जलालाई १० लाख, ज्योतिलाई ५ लाख, लक्ष्मीदेवीलाई ५० हजार, सुमन लोहनीलाई २ लाख र मनोजकुमार सोनीलाई १ लाख रुपैयाँ धरौटीमा छोड्न आदेश दिएको थियो ।

मोरङको धनपालथान गाउँपालिका–४ स्थित उमागौरी सहकारी संस्थाको २२ करोड ४८ लाख २७ हजार ७ सय रुपैयाँ हिनामिनागरी सहकारीको रकम अपचलन गरेको आरोपमा सहकारी ऐनअन्तर्गत मोरङ अदालतमा मुद्दा दर्ता भएको छ ।

गत मंसिर २७ गते सहकारीको रकम हिनामिना प्रकरणमा अञ्जलासहित २६ जनालाई प्रतिवादी बनाएर मोरङ अदालतमा मुद्दा दायर गरिएको थियो । अदालतले ३ पुसमा उनीसहित २५ जनाविरुद्ध पक्राउ पूर्जी जारी गरेको थियो । 

सहकारी ठगी मुद्दामा सहकारी अध्यक्ष शम्भुप्रसाद रौनियार र धनपालथान–४ का पूर्ववडाध्यक्ष रोशन राजवंशी पूर्पक्षका लागि कारागार चलान भएका छन् । अन्य धरौटीमा छुटेका छन् भने एक दर्जनभन्दा बढी अभियुक्त अझै फरार छन् ।

उमागौरी कृषि सहकारीमा ८ हजार ८ सय ४२ जना शेयर सदस्य थिए । शेयरबापत ३ करोड ८ लाख ९० हजार रुपैयाँ रकम रहेको थियो ।  सहकारीमा ७ सय ७ जना ऋणीहरूका नाममा २४ करोड ३० लाख २२ हजार ८ सय रुपैयाँ ऋण परिचालन भएको उल्लेख छ । हाल सहकारी बन्द छ ।