२७ असार २०८३, शनिबार
कबाड व्यवसायी संघर्ष समितिका अध्यक्ष रामकेवल गुप्तालगायतका व्यवसायीहरूले उपप्रधानमन्त्री एवं अर्थमन्त्री विष्णु प्रसाद पौडेललाई भेटेका छन् ।
बुधबार अर्थ मन्त्रालयमा भएको छलफलमा उनीहरूले व्यवसायीहरूको जिउधनको रक्षाका लागि मन्त्री पौडेलले सँग माग गरेका छन् ।
काठमाडौं महानगरपालिकाले २ वर्षदेखि आफ्ना प्रहरी परिचालन गरी गुण्डागर्दी शैलीमा कबाड व्यवसायी, संकलक मजदुरमाथि कुटपिट गर्ने, अपहरण गर्ने र कबाड व्यवसायका संरचना भत्काउने, संकलक र मजदुरका साइकल र समान जफत गर्ने काम गरिरहेको उनीहरूले बताएका छन् ।
काठमाडौं महानगरका मेयर बालेन्द्र शाहले महानगरबाट गरिब जनता, गरिखाने वर्गलाई हटाउने खोजेको व्यवसायीहरूको भनाइ छ ।
‘कबाड व्यवसायी र संकलकमाथि भइरहेको यो प्रकारको महानगरको गुन्डागर्दी ज्यादतीलाई तत्काल रोक्न लगाई व्यवसायीको जिउधनको रक्षाको लागि हामी कबाड व्यवसायी माननीय अर्थमन्त्रीज्यूसमक्ष अनुरोध गर्न चाहन्छौं’, उनीहरूले बुझाएको ज्ञापनपत्रमा भनिएको छ ।
सरकारको प्रचलित कानून बमोजिम दर्ता रही काठमाडौं महानगरपालिकाको विभिन्न वडामा कबाड व्यवसाय सञ्चालन गर्दै आएका उनीहरूले बताएका छन् । वर्षौंदेखि कबाड व्यवसाय गर्दै आएका व्यवसायीले सरकारलाई तिर्नुपर्ने राजस्व र कर समेत तिर्दै आएको उल्लेख गरेका छन् ।
‘देशमा सञ्चालित उद्योगहरू स्टील, बियर तथा मदिराजनय उद्योग, कागज, प्लाष्टिक, ब्याट्री, मेटल उद्योगलाई चाहिने कच्चा पदार्थ कबाड व्यवसायीले आपूर्ति गर्दै आएको छ । र, देशको व्यापार घाटा कम गर्न कबाड व्यवसायको भूमिका रहेको छ’, ज्ञापनपत्रमा भनिएको छ, ‘हाल यो व्यवसायमा एक लाख मानिस प्रतक्ष रोजगारमा आबद्ध रहेको कुरा यहाँलाई अवगत गराउन चाहन्छौं र वातावरणीय सरसफाइमा कबाड व्यवसायको योगदान रहेको छ ।’
