१० साउन २०८३, आइतबार
भारत गुजरातको अहमदाबादमा बिहीबार एअर इन्डियाको यात्रुवाहक विमान दुर्घटनामा परेको छ ।
हालसम्म प्राप्त विवरणअनुसार उक्त विमानमा चालकदलसहित २४२ जना सवार थिए र विमान लण्डनतर्फ उडेको थियो ।
भारती सञ्चारमाध्यमका अनुसार टेकअफको क्रममा विमानको सन्तुलन गुम्यो र मेघानीस्थित आवासीय क्षेत्रमा खस्यो ।
दुर्घटनापछि त्यस क्षेत्रमा बाक्लो धुवाँ देखिएको छ । हाल दमकल र राष्ट्रिय विपद् प्रतिक्रिया बलका टोलीहरू उद्धार र राहत कार्यमा खटिएका छन् ।
२४२ यात्रु बोकेर लण्डन जाँदै गरेको एअर इण्डियाको विमान टेकअफकै क्रममा दुर्घटनाग्रस्त भएको प्रेस ट्रस्ट अफ डन्डियाले जनाएको छ ।
टाइम्स अफ इन्डियाका अनुसार एअर इण्डियाको फ्लाइट नम्बर १७१ विमानमा २३० यात्रु, २ पाइलट र १० जना क्रु मेम्बर थिए ।
विमानमा गुजरात राज्यका पूर्वमुख्यमन्त्री विजय रुपाणी पनि सवार रहेका भारतीय सञ्चार माध्यमले जनाएका छन् ।
यसअघि पनि अहमदाबाद विमानस्थलमा यस्तै एउटा ठूलो दुर्घटना सन् १९८८ मा भएको थियो । त्यो बेला मुम्बईबाट अहमदाबाद आउँदै गरेको इन्डियन एयरलाइन्सको विमान विमानस्थल नजिकै दुर्घटना भएको थियो, जसमा १३३ जनाको ज्यान गएको थियो ।
१९ अक्टोबर १९८८ मा बोइङ ७३७–२०० विमानले बिहान ६:०५ बजे मुम्बईबाट उडान भरेको थियो । बिहान ६:२० मा पाइलटले अहमदाबाद विमानस्थलमा भिजिबिलिटी कम भएको भन्दै मौसमबारे जानकारी मागेका थिए । यद्यपि, विमानस्थलमा पुग्दा पाइलटले अवतरण अनुमति भने मागेनन् ।
बिहान ६:५३ बजे विमान चिलोदा कोतरपुर क्षेत्रमा रहेको रुख र विद्युत् ट्रान्समिसन टावरसँग ठोक्किएको थियो ।
ककपिटमा रहेको भ्वाइस रेकर्डरका अनुसार, पाइलटहरू कम भिजिबिलिटीबीच रनवे खोज्ने प्रयासमा थिए र लगातार विमान तल झार्दै थिए ।
विमान १००० फिटको उचाइमा पुग्दासाथ ट्रान्समिसन टावरसँग ठोक्किएको थियो र विमानस्थलदेखि करिब ३ किलोमिटर टाढा खसेको थियो ।
