काठमाडौंमा निरन्तर परिरहेको वर्षाका कारण आइतबार बिहान त्रिभुवन अन्तर्राष्ट्रिय विमानस्थलबाट हुने अधिकांश आन्तरिक उडानमा असर परेको छ । विशेषगरी हिमाली क्षेत्रमा हुने उडान रद्ध वा ढिला भएका छन् भने केही अन्तर्राष्ट्रिय उडानमा ढिलाइ भएको छ । 

विमानस्थल कार्यालयका अनुसार यति एयरलाइन्स, श्री एयरलाइन्स र बुद्ध एयरले गर्ने माउन्टेन फ्लाइट मौसमका कारण रद्द भएका छन् । यी कम्पनीले बिहान सबेरै माउन्टेन फ्लाइट गर्ने गरेका थिए । 

लुक्लातर्फ जान लागेका समिट, सीता र तारा एयरका तीन उडान ढिलो भएका छन् । भरतपुर, पोखरा र नेपालगञ्जतिरका उडानका लागि भने बोर्डिङ भइरहेको  छ ।

यसैगरी, अन्तर्राष्ट्रिय आगमनतर्फ टर्किस एयरलाइन्सको इस्तानबुलबाट आएको उडान निर्धारित समयभन्दा ३ मिनेट ढिलो अवतरण भएको छ । एयर इन्डियाको दिल्लीबाट आउने उडान करिब १ घण्टा ५ मिनेट ढिलो हुने देखिएको छ । दुबई, दोहा, दम्माम, शारजाह लगायतका स्थानहरूबाट आउने अन्य उडानहरू पनि निर्धारित समयभन्दा केही ढिलो आउने अनुमान गरिएको छ।

अन्तर्राष्ट्रिय प्रस्थान उडानतर्फ टर्किस एयरलाइन्सको इस्तानबुल जाने उडान अन्तिम तयारीमा रहेको छ भने एयर इन्डियाको दिल्ली जाने उडान ढिलो भएको छ। अन्य एयर अरबिया, फ्लाइ दुबई, ड्रुक एयर, कतार एयरवेज लगायतका उडानहरू ‘चेक-इन’ प्रक्रियामा रहेका छन्।

विमानस्थलका अधिकारीहरूका अनुसार काठमाडौं उपत्यकामा परेको वर्षा, हिमाली भेगमा बादल र कम भिजिबिलटीका कारण आन्तरिक उडान प्रभावित भएका हुन्। यद्यपि, अन्तर्राष्ट्रिय उडानहरूमा भने ठूलो अवरोध देखिएको छैन।