कीर्तिपुर नगरपालिकाकी एलिना थिङले काठमाडौं जिल्लाव्यापी वृहत् खेलकुद अन्तर्गत कराँतेको महिला एकल कातामा बुधबार स्वर्ण पदक जितेकी छन् । 

लैनचौरस्थित राष्ट्रिय टेबलटेनिस प्रशिक्षण केन्द्रमा भएको फाइनलमा एलिनाले तार्केश्वर नगरपालिकाकी प्रसन्न फुयाललाई पराजित गरिन् । 

उक्त स्पर्धामा नागार्जुन नगरपालिकाकी बन्दना तामाङ र आयोजक काठमाडौं महानगरपालिका-२६ की मिस्टी श्रेष्ठ तेश्रो भए । शीर्ष तीन स्थान हात पार्ने खेलाडीले क्रमशः ३० हजार, १५ हजार र पाँच–पाँच हजार रूपैयाँ नगद पुरस्कार प्राप्त गरे ।

महिला टिम कुमुतेमा सोनाम शेर्पा, समीक्षा ढुंगाना, मोनिका लामा, आयुशा प्रधान र मनीषा लामा सम्मिलित नागर्जुनको टोली पहिलो भयो । काठमाडौं महानगरपालिका-३१ का महिमा राई, आशिका राई, दिया तामाङ, नानु चौधरी र रुक्साना दनुवार सम्मिलित टोली दोश्रो भयो । 

गोकर्णेश्वरका टीकामाया जिम्मी, डोमा तामाङ, इभान जेलिना बस्नेत, यान्शु ठोकर र आयुशा तिमल्सिना सम्मिलित टोली तथा तार्केश्वरका करुणा गडेल, अनु मोक्तान, एलिना तामाङ, प्रतिक्षा तामाङ र सलिना तुलाधर सम्मिलित टोली संयुक्त रूपमा तेश्रो भए । पहिलो हुनेले ५० हजार, दोश्रोले २५ हजार तथा तेश्रोले १०–१० हजार रूपैयाँ पुरस्कार पाए । 

यसैगरी, वृहत खेलकुदअन्तर्गत पुरुष फुटसलमा वडा नम्बर २६ र वडा नम्बर १३ सेमिफाइनलमा प्रवेश गरेका छन् । लैनचौर खेल मैदानमा वडा २६ ले वडा १२ लाई ९–१ गोलको फराकिलो अन्तरले पराजित गर्‍यो । वडा १३ ले भने वडा नम्बर १४ लाई ४–३ गोलले हरायो ।

यसैगरी, वृहत् खेलकुदअन्तर्गत तेक्वान्दो बिहीबारदेखि शुरू हुनेछ । पुरुष र महिलातर्फ समान १०–१० स्पर्धा समावेश गरिएको तेक्वान्दोका संयोजक गौरव रजकले जानकारी दिए । प्रतियोगितामा २५९ जना खेलाडीको सहभागिता रहनेछ ।