आगामी तीन दिनभित्र नेपालका प्रमुख नदीहरूको जलसतह बढ्ने पूर्वानुमान गरिएको छ। कोशी, नारायणी, कर्णाली, महाकाली र तिनीहरूका प्रमुख सहायक नदीहरू साथै कन्काई, कमला, बागमती, पूर्वी राप्ती, पश्चिम राप्ती, र बबई नदीहरूमा जलसतह सतर्कता तहभन्दा तलै भए क्रमश: बढ्दै जाने देखिएको हो।

जल तथा मौसम विभाग अन्तर्गतको बाढी पूर्वानुमान महाशाखाले बिहीबार जारी गरेको सूचनामा नदी तटीय क्षेत्रमा बसोबास गर्ने नागरिकहरूलाई सतर्कता अपनाउन आग्रह गरिएको छ। विशेषगरी बाढीको जोखिममा पर्ने क्षेत्रमा हुने गतिविधिहरू—जस्तै माछा मार्ने, नदी पार गर्ने, डुंगा प्रयोग गर्ने, खेतीपाती गर्ने आदि कार्यहरूमा सावधानी अपनाउन सुझाव दिइएको छ।

महाशाखाका अनुसार वर्षा क्रमशः तीव्र हुँदै गएकाले जलस्रोतहरूमा एक्कासि पानीको बहाव बढ्न सक्ने सम्भावना रहन्छ। यस्तो अवस्थामा आकस्मिक बाढी आउन सक्ने जोखिमसमेत रहेको हुँदा स्थानिय प्रशासन, सुरक्षाकर्मी र विपद् व्यवस्थापन निकायलाई समेत उच्च सतर्कतामा रहन अनुरोध गरिएको छ।