युरोपियन फुटबलको प्रभावशाली क्लब म्यानचेस्टर सिटी फिफा क्लब विश्वकपको प्रि–क्वार्टरफाइनल चरणबाटै बाहिरिएको छ । क्लब विश्वकपको साविक विजेतासमेत रहेको इङ्लिस प्रिमियर लिग क्लब म्यानचेस्टर सिटी मंगलबार बिहान सम्पन्न खेलमा साउदी अरेबियन क्लब अल–हिलालसँग ४–३ गोलले पराजित भएको हो । 

म्यानचेस्टर सिटी र अल–हिलालबीचको खेल निकै प्रतिस्पर्धात्मक थियो । निर्धारित समय बराबरीमा टुंगिएपछि खेल अतिरिक्त समयतर्फ धकेलिएको थियो । अन्तत: अतिरिक्त समयमा बलियो प्रतिद्वन्द्वीलाई पाखा लगाउँदै अल–हिलाल क्वार्टरफाइनलमा पुग्न सफल भयो । 

खेलमा शुरूआती अग्रता भने म्यानचेस्टर सिटीले लिएको थियो । खेल शुरू भएको नवौँ मिनेटमा म्यान सिटीका लागि बेनार्डो सिल्भाले पहिलो गोल गरेका थिए । सोही गोलका कारण पहिलो हाफमा म्यान सिटी अगाडि रह्यो ।

खेलको दोस्रो हाफमा भने दुवै टोली आक्रामक रूपमा प्रस्तुत भएका थिए । निर्धारित समयको ४६औँ मिनेटमा अल–हिलालका लागि मार्कोस लियोनार्दोले जवाफी गोल गरे । ५२औँ मिनेटमा माल्कोम ओलिभेराले अल–हिलाललाई २–१ गोलको अग्रता दिलाए । 

यसैगरी, ५५औँ मिनेटमा म्यान सिटीका लागि अर्लिङ हालान्डले दोस्रो गोल गरे । ९४औँ मिनेटमा कालिदु कुलिबलीले अल–हिलालका लागि तेस्रो गोल थपे । १०४औँ मिनेटमा म्यान सिटीका लागि फिलिप फोडेनले तेस्रो गोल फर्काए ।

खेल प्रतिस्पर्धात्मक रुपमा अघि बढिरहँदा निर्धारित समयको ११२औँ मिनेटमा अल–हिलालका लागि मार्कोस लियोनार्दोले निर्णायक गोल गरेका थिए । उक्त खेलमा मार्कोसले व्यक्तिगत रुपमा गरेको यो दोस्रो गोल थियो । 

ब्राजिलियन क्लब फ्लुमिनेस, ब्राजिलकै पाल्मिरस, इङ्ल्यान्डको चेल्सी, फ्रान्सको पेरिस सेन्ट जर्मन (पीएसजी) र जर्मनीको बायर्न म्युनिख भने यसअघि नै प्रतियोगिताको क्वार्टरफाइनलमा प्रवेश गरिसकेका छन् । रियल म्याड्रिड र युभेन्ट्स तथा बोरुसिया डर्टमन्ड र मोन्टेरीबीचको खेलपछि क्वार्टरफाइनलमा पुग्ने सातौँ र आठौँ टोलीको टुंगो लाग्नेछ ।