फिफा क्लब विश्वकप फुटबल प्रतियोगिताको २१ औं संस्करणको उपाधिका लागि आइतबार राति दुई प्रभावशाली क्लब पेरिस सेन्ट जर्मन (पीएसजी) र चेल्सीबीच भिडन्त हुँदैछ । खेल नेपाली समय अनुसार, राति १२:४५ बजे शुरू हुनेछ ।

खेल अमेरिकाको न्यू जर्सीस्थित मेट लाइफ स्टेडियममा खेलिने छ । इङ्लिस प्रिमियर लिग क्लब चेल्सी र फ्रान्सेली क्लब पीएसजी जारी प्रतियोगितामा उत्कृष्ट प्रदर्शन गर्दै फाइनलसम्म पुगेका हुन् । यी दुवै टोलीले हालसम्म एक/एक खेल हारेका छन् ।

प्रतियोगिताको प्रारम्भिक चरणमा समूह ‘बी’ मा रहेको पीएसजी ब्राजिलियन क्लब बोटाफोगोसँग ०–१ गोलले पराजित भएको थियो । समूहगत चरणको बाँकी दुई खेलमा पीएसजीले एट्लेटिको मड्रिडलाई ४–० र सियाटल साउन्डर्सलाई २–० गोलले हराएको थियो ।

चेल्सी पनि प्रारम्भिक चरणको एक खेलमा पराजित भएको थियो । समूह ‘डी’ मा रहेको चेल्सी पनि ब्राजिलियन क्लब फ्लामेङ्गोसँग १–३ गोलले हारेको थियो । बाँकी दुई खेलमा चेल्सीले लस एन्जल्स एफसीलाई २–० र स्परेन्स डे ट्युनिसलाई ३–० गोलले पाखा लगाएको थियो ।

यसैगरी, चेल्सीले प्रिक्वार्टरफाइनलमा पोर्चुगिज क्लब बेनफिकालाई अतिरिक्त समयमा ४–१ गोलले, क्वार्टरफाइनलमा ब्राजिलिय क्लब पाल्मिरसलाई २–१ गोलले र सेमिफाइनलमा पनि ब्राजिलियन क्लब फ्लुमिनेसलाई २–० गोलले हराएको थियो ।

पीएसजीले भने प्रिक्वार्टरफाइनलमा अर्जेन्टिनी स्टार लियोनल मेसी आबद्ध अमेरिकी क्लब इन्टर मियामीलाई ४–० गोलले, क्वार्टरफाइनल खेलमा बलियो जर्मन प्रतिद्वन्द्वी बायर्न म्युनिखलाई २–० गोलले र सेमिफाइनल खेलमा स्पेनिस ‘पावर हाउस’ रियल मड्रिडलाई ४–० गोलले हराएको थियो ।

पछिल्लो समय पीएसजी निकै लयमा देखिएको छ । जारी फिफा विश्वकपमा पनि पीएसजीले निकै बलिया प्रतिद्वन्द्वीहरुलाई हराएर आफ्नो क्षमताको परिचय दिइसकेको छ । यसका अतिरिक्त, पीएसजी यूईएफए च्याम्पियन्स लिगको विजेता क्लब पनि हो ।

पीएसजीले च्याम्पियन्स लिगको फाइनलमा बलियो इटालियन सिरिए क्लब इन्टर मिलानमाथि ५–० गोलको एकपक्षीय जित हासिल गरेको थियो । पीएसजीका फाबियन रुइज पेना, ओसमान डेम्बेल, गोन्कालो रामोस, जोआओ नेभेस, अचरफ हकिमीलगायतका खेलाडी लयमा देखिएका छन् ।

यसैगरी, चेल्सीका पेड्रो नेटो, एन्जो फर्नान्डेज, लियाम डेलप, क्रिस्टोफर एनकुनकु, रिसे जेम्स, कोल पाल्मरलगायतका खेलाडी लयमा छन् । त्यसैले चेल्सी र पीएसजीबीचको उपाधि भिडन्त निकै रोचक हुने अनुमान गरिएको छ ।

चेल्सी र पीएसजीबीच पछिल्लो पटक सन् २०१६ को च्याम्पियन्स लिगमा भिडन्त भएको थियो । त्यो खेलमा पीएसजीले चेल्सीलाई २–१ गोलले हराएको थियो । त्यो खेलमा पीएसजीका लागि एड्रिन राबियोट र ज्लाटन इब्राहिमोभिचले गोल गरेका थिए । चेल्सीका लागि एक गोल भने डिएगो कोस्टाले गरेका थिए ।

चेल्सीले हालसम्म एकपटक फिफा क्लब विश्वकपको उपाधि जितेको छ । चेल्सीले सन् २०२१ मा उपाधि चुमेको थियो । चेल्सी सन् २०१२ मा भने उपविजेता बनेको थियो । पीएसजीले भने हालसम्म फिफा क्लब विश्वकपको उपाधि चुम्न सकेको छैन ।