१९ असार २०८३, शुक्रबार
एमाले नेतृ विद्या भण्डारीले आफू राष्ट्रपति हुँदा दुईपटक भएको संसद् विघटनबारे बोलेकी छन् ।
मदन भण्डारी फाउन्डेसनले काठमाडौंमा मंगलबार गरेको पत्रकार सम्मेलनमा भण्डारीले कसैको दबाबमा नभइ संवैधानिक हिसाबले मन्त्रिपरिषद्को सिफारिस कार्यान्वयन गरेको बताएकी हुन् ।
‘संसद् विघटन कुरामा १७ साल र ५१ सालको कुरा आइरहन्छन्,’ भण्डारीले भनिन्, ‘म राष्ट्रपति भएको बेलामा दुईपटक विघटन भएको कुरा आएको छ । दबाबभन्दा मन्त्रिपरिषद्को निर्णयलाई सदर गरेको हो । संवैधानिक, कानूनी, देशलाई निकास दिने विषय छलफलको हुन सक्छ । दबाबमा गरेको होइन । संवैधानिक विधि र व्यवस्था अनुसार मन्त्रिपरिषद्को निर्णयलाई कार्यान्वयन गरेको हुँ ।’
उनी राष्ट्रपति भएका बेला प्रधानमन्त्री केपी शर्मा ओलीले दुई पटक संसद् विघटनको सिफारिस गरेको थियो । जसलाई भण्डारीले सदर गरिदिएकी थिइन् ।
तर, सर्वोच्च अदालतले उक्त निर्णयलाई दुवैपटक बदर गरेर संसद् पुनर्स्थापना गरिदिएको थियो ।
