नेकपा एकता राष्ट्रिय अभियानका संयोजक वामदेव गौतमले सय वर्षको उमेरसम्म कम्युनिस्ट झण्डा बोकिराख्ने बताएका छन् ।

नेकपा एकीकृत समाजवादीसँगको पार्टी एकता घोषणा समारोहमा शक्रबार गौतमले ७० वर्षदेखि उचालेको कम्युनिस्ट झण्डा सय वर्षसम्म बोकिराख्ने बताएका हुन् ।

‘७ वर्षदेखि कम्युनिस्ट झण्डा बोक्न शुरू गरेको हुँ । अहिले ७७ वर्ष भए । सय वर्ष त बाँच्नु पर्ने हो लाग्छ, त्यो भन्दा बाँच्न जरुरी छैन,’ गौतमले भने, ‘त्यो बेलासम्म कम्युनिस्ट झण्डा बोकिराख्छु ।’

गौतमले राजतन्त्रको अन्त्य र कम्युनिस्ट पार्टीबीच एकता गर्ने उद्देश्यले आफूले राजनीति शुरू गरेको बताए ।  ‘राजतन्त्रको अन्त्य गर्ने र एउटै कम्युनिस्ट पार्टी बनाउने मेरो अभियान हो,’ गौतमले भने, ‘गणतन्त्र स्थापना भयो । ०७५ सालमा नेकपा बनायौं, जुन संकल्प लिएको थिए त्यो पूरा भयो । तर टिक्न सकेन ।’

कम्युनिस्ट एकता अभियानमा लाग्दा धेरै हण्डर ठक्कर खाएको स्मरण गर्दै गौतमले भने– 'आज म धेरै खुसी छु ।'