नेपाल दूरसञ्चार प्राधिकरणले टेलिग्राम एपमाथि तत्काल प्रतिबन्ध लगाउने निर्देशन जारी गरेको छ ।

प्राधिकरणले शुक्रवार एक सूचना जारी गर्दै टेलिग्राममार्फत अनलाइन ठगीका घटनाहरू निरन्तर बढिरहेको र मनी लान्डरिङजस्ता गम्भीर अपराधमा टेलिग्रामको संलग्नता रहेको उल्लेख गरेको छ ।

सूचनामा भनिएको छ, 'नेपालमा सञ्चालनमा रहेको टेलिग्राम एपमार्फत अनलाइन ठगीको संख्या निरन्तर बढिरहेको र मनी लान्डरिङजस्ता गम्भीर अपराधमा संलग्नता रहेको बुझिएकोले उक्त एपको पहुँचमा तत्काल रोक लगाउन सम्बन्धित सबै दूरसञ्चार सेवा प्रदायकहरूलाई निर्देशन गरिएको छ ।'

अनलाइन ठगीका अधिकांश घटनामा टेलिग्राम प्रयोग भएको पाइएपछि नेपाल प्रहरीले यसबारे अनुसन्धान गरेको थियो ।