०२ साउन २०८३, शनिबार
इंग्ल्याण्डसँगको चौथो टेस्टमा भारतले नाटकीय रूपमा हार टारेको छ । दोस्रो इनिङमा तीन ब्याटरले शानदार शतक बनाएपछि इंग्ल्याण्डको अपेक्षित जीत रोक्दै भारतले खेल ‘ड्र’ गरेको हो ।
पहिलो इनिङमा ३५८ रन बनाएको भारत जवाफमा इंग्ल्याण्डले ६६९ रन बनाएपछि ३११ रनले पछाडि परेको थियो । दोस्रो इनिङको शुरूआतमै २ विकेट गुमाएको भारतले त्यसपछि शानदार पुनरागमन गरेको हो ।
त्यसपछि कप्तान शुभमन गिल र केएल राहुलले १८८ रनको साझेदारी गरे । गिल १०३ रन बनाएर आउट भए भने राहुल ९० रनमा आउट भए ।
त्यसपछि भारतले विकेट खस्नै दिएन । रविन्द्र जडेजाले अविजित १०७ र वासिङटन सुन्दरले अविजित १०१ रन बनाएर भारतलाई सुरक्षित बनाए ।
पाँच खेलको सिरिज अहिले २–१ मा इंग्ल्यान्डको पक्षमा छ र अन्तिम निर्णायक टेस्ट द ओभलमा हुनेछ।
