१९ असार २०८३, शुक्रबार
गएराति देशका धेरै ठाउँमा सामान्यदेखि मध्यम वर्षा भएको छ । पछिल्लो १२ घण्टामा दाङमा सबैभन्दा धेरै ८५.२ मिलिमिटर र बाँकेमा ७१.२ मिलिमिटर पानी परेको मौसम पूर्वानुमान महाशाखाले जनाएको छ । मधेशको पर्सा, रौतहटलगायत ठाउँमा पनि पानी परेको छ ।
कोशी, बागमती, कर्णाली र सुदूरपश्चिमका थोरै स्थान र बाँकी ठाउँका एक–दुई स्थानमा हल्का वर्षा भइरहेको छ । केही दिन कमजोर रहेको मनसुनी वायु सक्रिय भएपछि आइतबारदेखि पानी पर्न थालेको हो ।
आज पनि देशका धेरै ठाउँमा पानी पर्ने महाशाखाले जनाएको छ । दिउँसो कोशी, बागमती र लुम्बिनी प्रदेशलगायत देशका पहाडी भूभागका धेरै स्थान तथा तराई भूभागका केही स्थानमा चट्याङसहित मध्यम वर्षाको सम्भावना छ। कोशी, बागमती र गण्डकीका पहाडी भूभागका एक–दुई स्थानमा भारी वर्षाको पनि सम्भावना रहेको महाशाखाले जनाएको छ ।
आज राति लुम्बिनीलगायत देशका पहाडी भूभागका थोरै स्थान तथा तराईका एक–दुई स्थानमा चट्याङसहित मध्यम वर्षाको सम्भावना छ ।
हाल देशभर मनसुनी वायुको प्रभाव छ। मनसुनको न्यून चापीय रेखा पश्चिममा सरदर स्थानको आसपास र पूर्वमा सरदर स्थानभन्दा उत्तरतर्फ अवस्थित छ ।
