३१ असार २०८३, बुधबार
वर्षाका कारण अवरुद्ध भएको सडक खुलाउन माग गर्दै स्थानीयले बैतडीको पुर्चौंडी नगरपालिका–१० को वडा कार्यालयमा तालाबन्दी गरेका छन् ।
पुर्चौंडी नगरपालिका–१० विजयपुरदेखि दोगडाकेदार हुँदै जिल्ला सदरमुकाम जोड्ने प्रमुख सडकखण्ड पहिरोको जोखिममा परेपछि स्थानीयले वडा कार्यालयमा पहिरो पन्छाउन माग गर्दै वडा कार्यालयमा ताला लगाएका सोही वडाका अम्मर महराले बताए ।
उक्त सडकखण्डको भङाड बस्तीमा पहिरो खस्दा छवटा घर जोखिममा छन् ।
बितेका १३ दिनसम्म पनि पहिरो पन्छाउने प्रयास नभएकाले आफूहरू ताला लगाउन बाध्य भएको उनले बताए ।
यसैबीच, वडाअध्यक्ष हिक्मतबहादुर विष्टले मशिन बिग्रेका कारण पहिरो पन्छाउन विलम्ब भएको जानकारी दिए ।
