२८ जेठ २०८३, बिहीबार
न्युजिल्यान्डका प्रभावशाली ब्याट्सम्यान टम ब्रुसले आफ्नो खेल जीवनको नयाँ अध्याय शुरू गर्ने भएका छन् । अब उनले न्युजिल्यान्डको तर्फबाट क्रिकेट नखेल्ने निर्णय लिएका छन् ।
३४ वर्षीय ब्याट्सम्यान टम ब्रुसले अब न्युजिल्यान्ड छोडेर स्कटल्यान्डको राष्ट्रिय टोलीबाट क्रिकेट खेल्ने निर्णय लिएका हुन् । उनले यसै महिना स्कटल्यान्डको राष्ट्रिय टोलीबाट ‘डेब्यू’ गर्नेछन् ।
यसै महिनाको अन्त्यमा क्यानडामा आईसीसी क्रिकेट वर्ल्ड कप लिग–२ शृंखला आयोजना हुँदैछ । उक्त शृंखलामा स्कटल्यान्ड पनि सहभागी हुनेछ ।
सोही शृंखलामार्फत टम ब्रुसले स्कटल्यान्डको टोलीबाट ‘डेब्यू’ गर्ने समाचारमा जनाइएको छ । लिग–२ शृंखला अगस्त २७ तारिखदेखि शुरू हुनेछ ।
टम ब्रुसको पिता स्कटल्यान्डको राजधानी एडिनबर्गमा जन्मिएका हुन् । सोही कारणले टम ब्रुसले पनि स्कटल्यान्डको राष्ट्रिय टोलीबाट खेल्ने अवसर पाएका हुन् ।
ब्रुसले यसअघि सन् २०१६ मा स्कटल्यान्ड डेभलपमेन्ट टोलीबाट पनि खेलेका थिए । त्यसपछि उनले न्युजिल्यान्डको टोलीबाट खेल्न थालेका हुन् ।
उनले न्युजिल्यान्डको राष्ट्रिय टोलीबाट १७ वटा टी–२० अन्तर्राष्ट्रिय क्रिकेट खेलेका छन् । त्यसमा उनले कुल दुई सय ७९ रन बनाएका छन् । उनको उच्च स्कोर अविजित ५९ रन हो ।
यसका अतिरिक्त उनले ९३ वटा प्रथम श्रेणीको खेल पनि खेलेका छन् । प्रथम श्रेणीको क्रिकेटमा उनले कुल ६ हजार दुई सय ६७ रन बनाएका छन् ।
‘मेरो परिवारको स्कटल्यान्डसँग निकै पुरानो र घनिष्ठ सम्बन्ध छ । स्कटल्यान्डको राष्ट्रिय टोलीबाट खेल्ने अवसर पाउनु मेरो लागि गर्वको विषय हो,’ टम ब्रुसले भनेका छन् ।
