०९ असार २०८३, मंगलबार
शुक्रबार भारतले आफ्नो ७९औं स्वतन्त्रता दिवस भव्यता र देशभक्तिको उत्साहका साथ मनाइरहेको छ । राजधानी नयाँ दिल्लीको लाल किल्लाको प्राचीरबाट प्रधानमन्त्री नरेन्द्र मोदीले देशलाई सम्बोधन गर्दै यो अवसरलाई विशेष बनाए ।
भारतीय सञ्चारमाध्यमहरूले प्रधानमन्त्री मोदीले स्वतन्त्रता दिवसमा अहिलेसम्मकै सबैभन्दा लामो सम्बोधन गरेको उल्लेख गरेका छन् । उनले १ घण्टा ४३ मिनेटसम्म सम्बोधन गरेका थिए ।
सम्बोधनका क्रममा उनले सन् २०४७ सम्म विकसित भारत निर्माण गर्ने महत्वाकांक्षी दृष्टिकोण प्रस्तुत गरे । आत्मनिर्भरता, आर्थिक सुधार र राष्ट्रिय सुरक्षामा जोड दिँदै उनले नयाँ भारतको ‘थीम’मा आधारित रहेर एकता, नवप्रवर्तन र लचिलोपनको सन्देश दिए ।
अवैध आप्रवासन, आतंकवाद र जनसांख्यिक परिवर्तनजस्ता जटिल चुनौतीहरूलाई समेत सम्बोधन गर्दै उनले भारतलाई विश्वको तेस्रो ठूलो अर्थतन्त्र र प्रविधि, रक्षा तथा दिगो विकासमा विश्व गुरू बनाउन अघि बढ्न भारतावासीलाई आग्रह गरे ।
प्रधानमन्त्री मोदीको सम्बोधन भारतीय स्वतन्त्रताको शताब्दी वर्ष २०४७ सम्म भारतलाई विकसित राष्ट्र बनाउने महत्वाकांक्षी लक्ष्यमा केन्द्रित थियो ।
उनले एकताको महत्वलाई जोड दिँदै भारतको एकता आफ्नो लागि सामूहिक संकल्प रहेको बताए ।
उनले भारतको बलियो समष्टिगत आर्थिक सूचकांकले भारत विश्वको तेस्रो ठूलो अर्थतन्त्र बन्ने बाटोमा रहेको पुष्टि गरेको बताए ।
आर्थिक सुधारको महत्त्वलाई जोड दिँदै उनले आगामी तिहारसम्म जीएसटी प्रणालीमा सुधार ल्याउने घोषणा गरे । यी सुधारले करको बोझ घटाउने र आवश्यक वस्तुहरूको मूल्य कम गर्ने उनको प्रतिबद्धता थियो ।
उनले एक लाख करोडको ‘प्रधानमन्त्री विकसित भारत रोजगार योजना’को घोषणा पनि गरे । यसले साढे ३ करोडभन्दा बढी युवाहरूलाई रोजगारीका अवसरहरू प्रदान गरेर भारतको युवा जनशक्तिलाई आर्थिक प्रगतिमा उपयोग गर्ने लक्ष्य राखेको उनको भनाइ छ ।
सम्बोधनका क्रममा प्रधानमन्त्री मोदीले आत्मनिर्भरताको महत्वलाई बारम्बार दोहोर्याएका थिए । उनले भने, ‘अरूमाथि धेरै निर्भर हुनु खतरनाक छ । आत्मनिर्भरता आयात-निर्यातमा मात्र सीमित छैन, हामीले हाम्रा क्षमताहरूलाई विस्तार गर्नुपर्छ ।’
उनले खाद्य सुरक्षामा भारतको आत्मनिर्भरताको प्रशंसा गर्दै स्वतन्त्रतापछि भोकमरीको चुनौतीलाई किसानहरूले समाधान गरेको उल्लेख गरे । साथै, उनले पाकिस्तानसँग गरिएको सिन्धु जलसन्धिलाई ‘एकपक्षीय’ भन्दै अस्वीकार गरे ।
उनले भने, ‘हाम्रा किसानहरूले सिन्धुको पानीमा अधिकार पाउनुपर्छ । यो शत्रुको जमिन सिँचाइ गर्न प्रयोग भइरहेको छ ।’
प्रधानमन्त्री मोदीले सम्बोधनका क्रममा स्वदेशी उत्पादनहरूमा गर्व गर्न आह्वान गरे । उनले ‘दाम कम, दम ज्यादा’ को मन्त्रलाई विश्व बजारमा भारतको प्रभाव बढाउन अपनाउनुपर्ने बताए ।
उनले ‘भोकल फर लोकल’लाई नागरिकको मन्त्र बनाउनुपर्ने जोड दिए । त्यस्तै, मेड इन इन्डिया उत्पादनहरूको सफलताको उदाहरण दिँदै उनले अपरेसन सिन्दूरको पनि उल्लेख गरे, जसले आत्मनिर्भरताको शक्ति प्रदर्शन गरेको थियो ।
राष्ट्रिय सुरक्षाको सवालमा मोदीले सुदर्शन चक्र मिसनको घोषणा गरेका छन् । यो मिसनले उन्नत निगरानी, साइबर सुरक्षा र भौतिक सुरक्षालाई एकीकृत गरेर मिसाइल र आतंकवादी हमलाहरूबाट नागरिक र पूर्वाधारको रक्षा गर्नेछ ।
यो प्रणालीलाई इजरायलको आइरन डोम र अमेरिकाको प्रस्तावित गोल्डेन डोमसँग तुलना गरिएको छ । उनले अपरेसन सिन्दूरको सफलताको प्रशंसा पनि गरे, जसमा भारतीय सशस्त्र बलले पाकिस्तानको आतंकवादी केन्द्रहरूलाई ध्वस्त पारेको थियो ।
उनले भने, ‘पहलगाममा भएको आतंकवादी हमलापछि भारत रिसाएको थियो । अपरेसन सिन्दूर त्यो रिसको अभिव्यक्ति हो ।’ यो हमलामा २६ सर्वसाधारणको ज्यान गएको थियो र भारतीय सेनाले ‘शत्रुको कल्पनाभन्दा पर’ गएर बदला लिएको उनले बताए ।
मोदीले पाकिस्तानको ‘न्युक्लियर ब्ल्याकमेल’लाई सहन नगर्ने र आतंकवादको रातो आतंकलाई अन्त्य गर्ने प्रतिबद्धता व्यक्त गरे ।
प्रधानमन्त्री मोदीले सम्बोधनका क्रममा भारतको प्राविधिक प्रगतिलाई भविष्यको आधारको रूपमा प्रस्तुत गरे । उनले मेड इन इन्डिया फाइटर जेट र गगनयान मिसनको तयारीको उल्लेख गर्दै भारतको अन्तरिक्ष प्रविधिमा भएको प्रगतिलाई प्रशंसा गरे ।
उनले अन्तरिक्ष स्टेसनमा पुगेका कप्तान सुभांशु शुक्लालाई अन्तर्राष्ट्रिय अन्तरिक्ष स्टेसनको यात्रा गरेकोमा सम्मान पनि गरे ।
साथै, उनले भारतको डिजिटल प्रगतिबारे बोल्दै भने, ‘हाम्रो यूपीआई प्लेटफर्मले विश्वमा राज गरिरहेको छ । विश्वको ५० प्रतिशत डिजिटल लेनदेन यूपीआईबाट हुन्छ ।’
उनले भारतको आफ्नै एआई इकोसिस्टम विकास गर्ने र सेमीकन्डक्टर उत्पादनलाई मिसन मोडमा अगाडि बढाउने प्रतिबद्धता व्यक्त गरे । उनले भने, ‘मेड इन इन्डिया चिपले चाँडै विश्व बजारमा बाढी ल्याउनेछ ।’
सम्बोधनका क्रममा प्रधानमन्त्री मोदीले सामाजिक र आर्थिक समावेशीकरणमा सरकारको उपलब्धिहरूलाई जोड दिए । उनले २५ करोड मानिसहरूलाई गरिबीबाट बाहिर निकालिएको र २ करोड महिलाहरूलाई ‘लखपति दिदी’ बनाइएको दाबी पनि गरे ।
मुद्रा योजना र महिला स्वयं-सहायता समूहहरूले क्रान्ति ल्याएको उनको भनाइ थियो । उनले किसानहरूको योगदानको प्रशंसा गर्दै भने, ‘मोदी किसानहरूको लागि पर्खालजस्तै उभिनेछ, कुनै पनि किसान विरोधी नीतिलाई सहनेछैन ।’
सम्बोधनका क्रममा मोदीले भारत र अमेरिकाबीचको ‘ऐतिहासिक सम्बन्ध’को पनि प्रशंसा गरे । स्वतन्त्रता दिवसको अवसरमा अमेरिकी विदेशमन्त्री मार्को रुबियोले भारतलाई शुभकामना दिएका थिए । उक्त शुभकामनामा रुबियोले दुई देशहरूको साझा दृष्टिकोणले शान्तिपूर्ण, समृद्ध र सुरक्षित इन्डो-प्यासिफिक क्षेत्र निर्माण गर्ने उल्लेख गरेका छन् ।
