शिक्षक सेवा आयोगले माध्यमिक तहको अध्यापन अनुमति पत्रका लागि दरखास्त आव्हान गरेको छ । आयोगले साउन ३१ गते एक सूचनामार्फत इच्छुक उम्मेदवारले अनलाइनमार्फत आवेदन दिन सक्ने व्यवस्था गरेको हो ।

सूचनाअनुसार, शिक्षक सेवा आयोग नियमावली, २०५७ को नियम ९ को उपनियम (१) को खण्ड (ग) र नियम ९ को उपनियम (७) बमोजिम तोकिएको न्यूनतम शैक्षिक योग्यता पुगेका तथा आवश्यक तालिम प्राप्त गरेका व्यक्तिहरूले मात्र दरखास्त दिन सक्नेछन् ।

दरखास्त आयोगको आधिकारिक अनलाइन प्रणाली https://license.tsc.gov.np/ मार्फत दिने व्यवस्था गरिएको छ । विस्तृत विवरण आयोगको वेबसाइट www.tsc.gov.np मा प्रकाशित गरिएको आयोगले जनाएको छ ।

आयोगले २०८२ साउन ३० गतेको निर्णयानुसार यो विज्ञापन प्रकाशित गरिएको समेत सूचनामा उल्लेख गरेको छ ।