११ साउन २०८३, सोमबार
नेपालको एकमात्र रात्रीकालीन दौड प्रतियोगिता ‘नेपालगन्ज १० नाइट रन’मा यो वर्षदेखि रिले दौड विधा पनि समावेश गरिने भएको छ । विश्व दौडको साझा संस्था एसोसियसन अफ इन्टरनेसनल म्याराथन एण्ड डिस्टेन्स रेस (एम्स) बाट मान्यता प्राप्त गरेपछि पहिलो पटक हुन लागेको नाइट रनको यो दोस्रो संस्करण हो ।
एम्सद्वारा यसअघि नै प्रमाणीकरण गरेको रुटमै रात्री दौडसमेत सन्चालन हुनेछ । असोज ३ गते संविधान दिवसको अवसरमा दीप प्रज्ज्वलनसँगै सुरु हुने नाइट रनमा १० किलोमिटर पुरुष र महिला खुला दौड समावेश गरिएको छ ।
यसैगरी, प्रतियोगितामा ५ किलोमिटर छात्र तथा छात्रा स्कुलस्तरीय दौड, १० किलोमिटर भेट्रान्स पुरुष (५० वर्षमाथि) दौड, ५ किलोमिटर भेट्रान्स महिला (४५ वर्षमाथि) दौड र १० किलोमिटर मिक्स रिले (चारजनाको समुह दौड) स्पर्धा पनि समावेश गरिएको छ ।
मिक्स रिले नेपालमा पहिलोपटक प्रयोग गर्न लागिएको आयोजकले जनाएको छ । यसमा स्कुल, कलेज, क्लब वा कुनै पनि संघ–संस्थाले महिला पुरुष गरी चार जनाको समूह बनाएर प्रतिस्पर्धा गर्न सक्ने जानकारी रेस डाइरेक्टर चन्द्रबहादुर गुरुङले दिए ।
‘१० किलोमिटरलाई समान चार दूरीमा बाँडेका छौं । सोहीअनुसार धावकले आफ्नो पालोमा आफ्नो दूरी पुरा गर्नुपर्ने हुन्छ,’ रेस डाइरेक्टर गुरुङले भने । पहिलोपटक समावेश गरिएको रिले दौडले सर्वसाधारलाई पनि दौडको मजा दिने एम्सका दुत तथा धारा नेपालगन्ज म्याराथनका संस्थापक टीएस ठकुरीले बताए ।
‘नेपालको पुरानो सहरलाई जीवन्त बनाइरहन दौडका विभिन्न विधालाई उजागर गर्न प्रयासरत छौं,’ संस्थापक ठकुरीले भने, ‘नेपालगन्जलाई दौडको सहर बनाउने अभियानअन्तर्गत हामीले कर्म गरिरहेका छौं । दौडिरहने सहरको परिचयले पनि सहरको ब्रान्डिङमा सघाउने छ ।’
नेपालगन्ज १० नाइट रन एक दशक यात्रा पूरा गरेको धारा नेपालगन्ज म्याराथनकै भगिनी इभेन्ट हो । यी दुवै दौडको संयोजन एवं व्यवस्थापन क्रियटिभ गन्जले गर्दै आएको छ । नेपालगन्ज उपमहानगरपालिका नजिकै रहेको बीपी चोकदेखि सुरु भइ राँझा चोक पुगेर पुन: सोही रुटबाट बीपी चोकमै पुगेपछि १० किलोमिटर दौड पुरा हुनेछ ।
