२८ जेठ २०८३, बिहीबार
भारत र चीनले नेपाल समेतको त्रिदेशीय सीमा नाका लिपुलेकमार्फत दुई पक्षीय व्यापार थाल्ने सहमति गरेका छन् । चिनियाँ विदेश मन्त्री वाङ यीको भारत भ्रमणका क्रममा सो सहमति भएको हो ।
अगस्ट १८ र १९ गते भएको वाङ यीको भारत भ्रमणका क्रममा भएको १२ बुँदे सहमतिको नवौं बुँदामा लिपुलेकमार्फत सीमा व्यापार खोल्ने उल्लेख छ ।
‘दुईटै पक्ष तोकिएका तीन व्यापारिक बिन्दुहरू लिपुलेक पास, शिपकी ला पास र नाथू ला पास हुँदै सीमा व्यापार पुन: खोल्न सहमत भएका छन्,’ भारतीय विदेश मन्त्रालयले मंगलबार अबेर सार्वजनिक गरेको सहमति पत्रमा भनिएको छ ।
यसअघि पनि लिपुलेकमा भारत र चीनले नाका खोल्ने सहमति गरेको भन्दै नेपालले असहमति जनाउँदै आएको थियो । २०७६ सालमा भारत र चीनले व्यापारिक नाका खोल्ने सहमति गरेका थिए ।
भारतीय राष्ट्रिय सुरक्षा सल्लाहकार अजित डोबलको निमन्त्रणामा वाङ नयाँ दिल्लीको भ्रमणमा गएका थिए । वाङले सोमबार भारतीय विदेश मन्त्री डा. एस जयशंकरसँग भेटवार्ता गरेका थिए ।
भारत र चीन सीमा विवादबारे वाङ २४ औं चरणको वार्तामा सहभागी भएका थिए । त्यसपछि दुई देशका तर्फबाट संयुक्त वक्तव्य जारी गरिएको हो ।
भारत र चीनबीच सीमा क्षेत्रमा शान्ति कायम गर्नेबारे सहमति भएको छ । पछिल्लोपटक दोक्लम र लद्दाखका सीमामा विवाद भएपछि दुई देशबीच तनावको स्थिति सिर्जना भएको थियो ।
दोक्लम विवादपछि दुई देशबीच सीधा हवाई उडान समेत रोकिएको थियो ।
