०८ साउन २०८३, शुक्रबार
इजरायलका रक्षामन्त्री इजरायल काट्जले गाजा शहर कब्जा गर्ने योजनालाई अनुमोदन गरेका छन् । यसका लागि उनले करिब ६० हजार अतिरिक्त सिपाही (रिजर्भ फोर्स)लाई ड्युटीमा बोलाउन आदेश दिएको अन्तर्राष्ट्रिय सञ्चार माध्यमहरूले जनाइएका छन् ।
इजरायलले गाजा शहर कब्जा गर्ने मोर्चामा १ लाख ३० हजार सिपाही तैनाथ गर्ने निर्णय गरेको छ । सैनिकहरूलाई ड्युटीमा सामेल हुनुभन्दा कम्तिमा २ हप्ताअघि सूचना दिइनेछ ।
उनको आदेशसँगै इजरायली सेनाले गाजा शहर कब्जा गर्न करिब ६० हजार रिजर्भ सैनिकहरूलाई बोलाएको छ ।
पहिलो ब्याचमा, सेप्टेम्बर २ मा लगभग ४०-५० हजार सिपाही बोलाइनेछ। दोस्रो ब्याच नोभेम्बर-डिसेम्बरमा र तेस्रो ब्याच २०२६ मा फेब्रुअरी-मार्चमा बोलाइने समाचारमा उल्लेख छ ।
गाजा शहरमा बसोबास गर्ने लाखौं प्यालेस्टिनीहरूलाई खाली गराइने र दक्षिणी गाजामा बनाइएका आश्रयस्थलहरूमा सर्ने आदेश दिइने अनुमान छ।
इजरायलको यो योजनाको धेरै सहयोगी देशहरूले आलोचना गरेका छन् । संयुक्त राष्ट्र संघ र गैरसरकारी संस्थाहरूले अर्को आक्रमणले ठूलो मात्रामा विस्थापन निम्त्याउने चेतावनी दिएका छन् ।
कब्जा गर्ने कार्यमा सेनाका ५ डिभिजनहरू संलग्न हुने समाचारमा उल्लेख छ । यसमा १२ ब्रिगेड-स्तरीय टोलीहरू हुनेछन्, जसमा पैदल सेना, ट्याङ्क, तोपखाना, इन्जिनियरिङ र समर्थन एकाइहरू समावेश हुनेछन् । यस बाहेक, गाजा डिभिजनका उत्तर र दक्षिण ब्रिगेडहरू पनि भाग लिनेछन् ।
इजरायली सेनाले गाजा शहर कब्जाको तयारी शुरू भएको जनाएको छ । हाल गाजा शहरको बाहिरी इलाकामा अपरेशन भइरहेको छ ।
