१९ असार २०८३, शुक्रबार
रुपन्देहीका दुई वटा गाउँपालिकाका पूर्वअध्यक्ष नेकपा एमालेमा प्रवेश गरेका छन् ।
सम्मरीमाई गाउँपालिका पूर्वअध्यक्ष जितेन्द्रनाथ शुक्ला (बब्लु) र मर्चवारी गाउँपालिकाका पूर्वअध्यक्ष केशवनन्द बानियाँ शनिबार एमाले प्रवेश गरेका हुन् । साथै उनीकहरूका समर्थक पनि एमालेमा प्रवेश गरेका छन् ।
उनीहरूलाई शनिबार एमाले उपाध्यक्ष तथा अर्थमन्त्री विष्णु पौडेलले पार्टीमा स्वागत गरे । शुक्ला र बानियाँ दुवै जना आफ्नो पालिकामा मात्र नभई छिमेकी पालिकामा समेत राम्रो प्रभाव रहेका नेता मानिन्छन् ।
सम्मरीमाई ६ असुरैना निवासी शुक्ला, गच्छदार नेतृत्वको मधेशी जनअधिकार फोरमबाट २०७४ मा पालिका अध्यक्ष निर्वाचित भएका थिए ।
त्यसपछि कांग्रेस अनि एमाले हुँदै २०७९ मा माओवादीमा प्रवेश गरेर स्थानीय तहमा उम्मेदवार बनेर पराजित भएका थिए ।
एमाले प्रवेश गरेका बानियाँले २०७४ सालमा उपेन्द्र यादव समूहको मधेशी जनअधिकार फोरमबाट मर्चवारी गाउँपालिकाको अध्यक्ष जितेका थिए । २०७९ सालमा लोसपाबाट गाउँपालिका अध्यक्षमै पुनः उम्मेदवार बनेका उनी त्यतिबेला भने पराजित भए ।
