काठमाडौं महानगरपालिकाका मेयर बालेन्द्र शाहले आन्दोलनकारीलाई सरकारको नेतृत्व गर्न तयार हुन आग्रह गरेका छन् ।

मंगलबार सामाजिक सञ्जाल फेसबुकमा लेख्दै उनले प्रधानमन्त्री केपी शर्मा ओलीको राजीनामा आइसकेकाले संयमित हुन आग्रह गरे ।

उनले भनेका छन्, 'हामीले स्पष्ट रूपमा भनेका थियौं । यो नितान्त जेनजीको आन्दोलन हो । तपाईंहरूको हत्याराको राजीनामा आइसकेको छ । अब संयमित हुनुहोला ।'

उनले सत्ताको नेतृत्वका लागि सेना प्रमुखसँग वार्ता गर्न तयार हुन आग्रह पनि गरेका छन् । 'देशको जनधनको क्षति भनेको तपाईं हाम्रै सम्पत्तिको क्षति हो । तपाईं–हामी अब संयमित हुनु जरुरी छ । अब तपाईंको पुस्ताले नै देशको नेतृत्व गर्नु पर्नेछ । तयार रहनुहोला । साथै, सेना प्रमुखसँग वार्ता गर्न पनि तयार हुनुहोला ।'

उनले वार्ताका लागि संसद् विघटन हुनुपर्ने शर्तसमेत राखेका छन् । 'तर याद रहोस्— वार्ता गर्नुअघि संसद् विघटन भएको हुनुपर्छ,' उनले लेखेका छन् ।