११ साउन २०८३, सोमबार
ब्राजिलको सर्वोच्च अदालतले २०२२ को चुनावी हारपछि पनि सत्तामा टिकिरहने प्रयासमा ‘कू’को षड्यन्त्रमा पूर्वराष्ट्रपति जेयर बोल्सनारोलाई दोषी ठहर गर्दै २७ वर्ष तीन महिनाको जेल सजाय तोकेको छ ।
सन् २०१९ देखि २०२२ सम्म ब्राजिलमा शासन गरेका दक्षिणपन्थी नेतालाई पाँच मुद्दामा दोषी ठहर गरिएको समाचार संस्था एपीले जनाएको छ । पाँच न्यायाधीशको प्यानलमध्ये चारजनाले उनलाई दोषी ठहराएका छन् । समाचारअनुसार एक न्यायाधीश लुइज फुक्सले भने उनको पक्षमा फैसला सुनाउँदै सबै आरोपबाट सफाइ दिन मतदान गरेका थिए ।
७० वर्षीय बोल्सनारो हाल नजरबन्दमा छन् । यो फैसलाविरुद्ध सर्वोच्च अदालतको ११ सदस्यीय बेन्चमा पुनरावेदन गर्ने उनका वकिलहरूको भनाइ छ । यद्यपि, बोल्सनारोले सबै आरोप अस्वीकार गरेका छन् । अदालतको सुनुवाइमा व्यक्तिगत रूपमा उपस्थित नभएर आफ्ना वकिलहरूलाई पठाएका छन् ।
यो फैसला देशको राजनीतिमा थप विभाजन ल्याउने र यसले अमेरिकाको असन्तुष्टि बढाउने अनुमान गरिएको एपीको समाचारमा उल्लेख छ ।
