१० साउन २०८३, आइतबार
मोरङको सुन्दरहरैंचास्थित विराटचोकमा रहेको नेपालीरिका होटलमा जेनजी आन्दोलनका क्रममा तोडफोड तथा आगजनी भयो । गत भदौ २४ गते भएको तोडफोड, आगजनी र लुटपाटबाट ३० करोड रुपैयाँभन्दा बढीको क्षति भएको होटलका सञ्चालक भोला दुलालले जानकारी दिए ।
जेनजी आन्दोलनको दोस्रो दिन केही व्यक्तिले होटलमा कांग्रेस–एमालेका नेताहरू लुकेको हल्ला फैलाए । सोही हल्लाको भरमा प्रदर्शनकारीहरू होटलमा प्रवेश गरे ।
सञ्चालक दुलालका अनुसार भिडले होटलमा रहेका पाहुनालाई समेत दुर्व्यवहार गर्दै लुटपाट मच्चायो र आगजनी शुरू गर्यो । ‘नेता लुकेको हल्ला केवल बहाना थियो,’ दुलालले भने, ‘वास्तविक मनसाय लुटपाट गर्ने र क्षति पुर्याउने देखियो ।’
लुटपाट गर्न आउने स्थानीय नै रहेको उनले बताए ।
अहिले होटलको फेसबूक पेजमा लुटपाट गर्नेहरूको तस्वीर सार्वजनिक गर्न थालिएको छ ।
आगजनीबाट होटलका ६० भन्दा बढी कोठा, भिल्ला, सेमिनार हल र फ्रन्ट डेस्क पूर्णरूपमा जलेर नष्ट भएका छन् । कुल १५२ करोडको लगानीमा निर्माण भएको १४६ कोठे होटलको अधिकांश संरचना ध्वस्त छन् ।
यता होटल जलिरहेका बेला सञ्चालक भोलाका छोरा आकास अमेरिकामा थिए । उनी व्यावसायिक कामकै लागि अमेरिका गएको बताइएको छ ।
होटल जलेपछि आकासले सामाजिक सञ्जालमा भावुक स्टाटस लेखेका छन् । ‘मेरो बुवाको ३२ वर्षको अथक मेहनत, परिश्रम र रगतको थोपाले सिञ्चित थियो नेपालीरिका । मैले हरेक पल्ट बुवालाई विदेशमै लगानी गर्नुपर्छ भन्थें, तर बुवाले ‘जे गर्ने हो, यही देशमा गर्ने हो’ भन्नुभयो । यहाँको इँटा, माटो, ढुंगा मात्र जलेन । एउटा उद्योगीको विश्वास, व्यवसायीको निष्ठा, समाजको विकास र प्रत्येक कर्मचारीको भरोसा पनि जलिरह्यो,’ उनले लेखेका छन् ।
व्यवसायी दुलाल शून्यबाट शिखरमा पुगेका एक सफल उद्यमी हुन् । शिशु अवस्थामै बुवा गुमाएका उनले आमाको संरक्षणमा एसएलसी पास गरे । आर्थिक अवस्था कमजोर भएपछि २०४६ सालमा मासिक २०० रुपैयाँ तलबमा एक मेसिनरी पसलमा काम थालेका थिए ।
तीन वर्षको अनुभवपछि २०४९ सालमा ७० हजारको लगानीमा विराटचोकमा आफ्नै मेसिनरी पसल खोले । त्यसपछि उनले कहिल्यै पछाडि फर्केर हेर्नुपरेको थिएन । आज उनी पूर्वाञ्चल ल्युब आयल (पीएलओ) का प्रबन्ध निर्देशक हुनुका साथै करिब दुई दर्जन उद्योग, व्यवसायमा आबद्ध छन् ।
विदेशमा देखेका राम्रा कुराहरू आफ्नो ठाउँमा लागू गर्ने सोच राख्ने दुलालले सुन्दरहरैँचामा पुस्तकालयसहितको सार्वजनिक शौचालयसमेत बनाउने अभियान चलाएका थिए ।
ठूलो क्षति र पीडाका बीच पनि उद्यमी दुलालले हिम्मत हारेका छैनन् । उनले दशैं अगाडि नै ८० देखि ९० वटा कोठा मर्मत गरेर होटलको ‘सफ्ट ओपनिङ’ गर्ने योजना बनाएका छन् । पूर्ण सञ्चालनमा आउन ४ देखि ७ महिना लाग्ने उनको अनुमान रहेको छ ।
उनले कुनै पनि कर्मचारीलाई नहटाउने घोषणा गरेका छन् । ‘हामीले कुनै पनि कर्मचारीलाई निकाल्दैनौं । उहाँहरूको रोजगारी सुरक्षित छ र यस वर्षको दशैं बोनससमेत उपलब्ध गराइनेछ,’ दुलालले प्रतिबद्धता जनाए ।
उनको यो संघर्षशील यात्रा र स्वदेशमै केही गर्ने अठोटमाथि भएको प्रहारले समग्र लगानीकर्ताको मनोबलमा चोट पुगेको छ । होटल व्यवस्थापनले लुटपाटमा संलग्न व्यक्तिहरूलाई भिडियो र फोटोमार्फत पहिचान गरी कानूनी कारबाही अगाडि बढाउने र लुटिएका सामान फिर्ता गर्न आग्रह गरेको छ ।
