११ साउन २०८३, सोमबार
स्याङ्जा १० पुस— चुनावी समीक्षा गर्न बसेको बैठकमा अन्तरघातको कुरा उठेपछि स्याङ्जामा नेपाली कांग्रेसका कार्यकर्ताहरुबीच कुटाकुट भएको छ । कुटाकुटमा रामचन्द्र पोडेल समूहका तीनजना कार्यकर्ता घाइते भएका छन् ।
कांग्रेस क्षेत्र नम्बर दुईले सोमबार वालिङमा आयोजना गरेको समीक्षा बैठकमा भएको छलफल झपडमा परिणत भएको हो । सभापति शेरबहादुर देउवा पक्षका कार्यकर्ताले बरिष्ठ नेता रामचन्द्र पौडेल पक्षका कार्यकतामाथि आक्रमण गरेका थिए ।
कुटाकुटमा पोडेल समूहका सुशील काफ्ले, भेषराज अर्याल र कमल ढकाल घाइते भएका छन् । घाइतेद्वय अर्याल र ढकाललाई उपचारको लागि हेलिकप्टर मार्फत काठमाडौं पठाइएको छ । मंसिर २१ गते भएको चुनावमा सो क्षेत्रबाट उपप्रधानमन्त्री समेत रहेका कांग्रेस नेता गोपालमान श्रेष्ठ पराजीत भएका थिए ।
प्रदेशमा चुनाव लडेका नेविसंघका पूर्व नेता विष्णु पौडेल समूहले आक्रमण गरेको पौडेल समूहले बताएको छ । नेपाली कांग्रेसका पूर्व सांसद राजु थापाले बैठकमा सामान्य हात हालाहाल भएको बताए । ‘पार्टीको बैठकमा छलफल हुँदा सामान्य हातहालाहाल भएको हो, कुनै ठूलो घटना होइन’ थापाले लोकान्तरसँग भने ।
*सन्दर्भ तस्वीर, फाइल फोटो
