२३ असार २०८३, मंगलबार
काठमाडौं, १४ पुस– निर्वाचन आयोगले दिएको समयसीमाअनुसार राजनीतिक दलहरुले शुक्रबार समानुपातिकतर्फका सांसदहरुको सूची बुझाउदै छन् । आयोगले कार्यालय समयभित्र दलहरुलाई प्रदेशसभामा पाएको सिट संख्याअनुसार समानुपातिक सांसदको सूची बुझाइसक्न भनेको छ ।
दलहरु प्रदेशसभातर्फको समानुपातिक सांसदको टुंगो लगाउन तयारीमा जुटेका छन् । निर्वाचन आयोगका अनुसार बिहीबार नेमकिपा, विवेकशील साझा र दुई नम्बर प्रदेशमा एक सिटमात्र पाएको नेपाल संघीय समाजवादी पार्टीले समानुपातिकको सूची बुझाएका छन् ।
नेकपा एमालेले प्रदेशसभामा समानुपातिकतर्फ पाएको ७५ सांसदको नामावली बिहीबार नै टुंगो लगाइसकेको छ । कांग्रेस र माओवादी केन्द्र नाम टुंगो लगाउन आन्तरिक गृहकार्यमा छन् । कांग्रेसले ७२ र माओवादीले ३५ सिट पाएका छन् ।
यसैगरी संघीय समाजवादी फोरम नेपालले १३, राजपाले १२, राप्रपाले ३, साझा विवेकशीलले ३ र राष्ट्रिय जनमोर्चाले २ सिट पाएका छन् । नयाँ शक्ति, संघीय लोकतान्त्रिक राष्ट्रिय मञ्च, नेपाल संघीय समाजवादी पार्टी, नेपाल मजदुर किसान पार्टी र राप्रपा प्रजातान्त्रिकले भने प्रदेशसभामा १/१ समानुपातिक सिट पाएका छन् ।
