३० असार २०८३, मंगलबार
आगामी फागुन २१ मा हुने प्रतिनिधिसभा निर्वाचन नजिकिँदै गएको छ ।
देशैभर निर्वाचनको तयारी तीव्र रूपमा भइरहेको छ । विकट एवं हिमाली जिल्ला मनाङमा पनि चुनावको तयारी चलिरहेको छ । तर, माथिल्लो क्षेत्रमा भने मतदान केन्द्र र आसपासका क्षेत्र हिउँले सेताम्मे बनेको छ ।
हिउँले ढाकिएका मतदान केन्द्र अनुगमन, तयारीमा समेत कठिन देखिएको छ । कूल मतदाता सात हजार रहेको छ भने यहाँ एक अस्थायी गरी २९ वटा मतदान केन्द्र निर्धारण गरिएको छ । जसमध्ये माथिल्लो क्षेत्रका मतदान केन्द्र हिउँले भरिएका छन् ।
चार वटा स्थानीय तह रहेको यस जिल्लाका हिमपात हुने समय भएकाले जोखिमयुक्त देखिएका छन् । तीन वटा पालिका सडक सञ्जालको पहुँचमा रहेका छन् । तर, नार्पाभूमि गाउँपालिकामा हालसम्म पनि सडक सञ्जालको पहुँच पुगेको छैन । जसले यहाँका निर्वाचन कर्मचारी, मतपेटिकालगायतका निर्वाचनमा आवश्यक सामग्री ढुवानीमा पनि समस्या हुने देखिएको छ ।
नासोँ गाउँपालिकामा नौ, चामेमा एक अस्थायीसमेत गरी ६, नार्पाभूमिमा पाँच र मनाङ ङिस्याङमा नौ मतदान केन्द्र रहेको निर्वाचन कार्यालयले जनाएको छ । नार्पाभूमिका ५ र मनाङ ङिस्याङका ९ वटा मतदान केन्द्र हिउँले छोपिएको अवस्थामा रहेका छन् ।
यहाँ प्रतिनिधिसभा सदस्य पदका लागि तीन दलको प्रतिस्पर्धा हुने भएको छ । नेपाली कांग्रेस, नेपाली कम्युनिस्ट पार्टी र मङ्गोल नेसनल अर्गनाइजेनबीच प्रतिस्पर्धा हुने भएको छ ।
