०८ साउन २०८३, शुक्रबार
आसिफ शेख, विनोद भण्डारीदेखि अर्जुन कुमालसम्म प्रधानमन्त्री कपमा जसले आफूलाई अब्बल सावित गरे
प्रधानमन्त्री कप पुरुष एकदिवसीय राष्ट्रिय क्रिकेट प्रतियोगिताको लिग चरणका खेल सकिएका छन् । प्रतियोगितामा १० टोली सहभागी छन् । सहभागी सबै टोलीले लिग चरणमा नौ–नौ खेल खेलिसकेका छन् ।
लिग चरणमा कुल ४५ खेल खेलियो । अब फाइनल खेलमात्र बाँकी छ । विभागीय टोली त्रिभुवन आर्मी क्लब र सुदूरपश्चिम प्रदेश प्रतियोगिताको फाइनलमा पुगेका छन् । यी दुई टोलीबीच शुक्रबार वीरगञ्जस्थित नारायणी रंगशालामा उपाधिका लागि भिडन्त हुनेछ ।
यो प्रतियोगिताबाट आगामी सिजनको जय ट्रफीका लागि पनि टोलीहरू छानिएका छन् । तालिकाको माथिल्लो ६ स्थानमा रहने टोली त्रिभुवन आर्मी क्लब, सुदूरपश्चिम प्रदेश, एपीएफ क्लब, मधेश प्रदेश, नेपाल पुलिस क्लब र लुम्बिनी प्रदेश आगामी जय ट्रफीमा छानिएका हुन् ।
प्रधानमन्त्री कपलाई यसै महिना आयोजना हुने क्रिकेट विश्वकप लिग–२ शृंखलाको तयारीका रूपमा पनि लिइएको छ । लिग–२ को १७औँ शृंखला अप्रिल २५ देखि कीर्तिपुरस्थित अन्तर्राष्ट्रिय क्रिकेट मैदानमा शुरू हुनेछ ।
यो शृंखलामा नेपालले संयुक्त अरब इमिरेट्स (यूएई) र ओमानको सामना गर्नेछ । यसपटक प्रधानमन्त्री कप क्रिकेटमा अधिकांश टोली पूरै ओभर मैदानमा टिक्न नसके पनि केही खेलमा गतिला कीर्तिमान भने बनेका छन् । यस्तै केही महत्त्वपूर्ण कीर्तिमानको बारेमा यहाँ चर्चा गरिएको छ ।
००
पहिलो दोहोरो शतकको कीर्तिमान
एपीएफ क्लबका आसिफ शेख प्रधानमन्त्री कप पुरुष एकदिवसीय क्रिकेटको इतिहासमा दोहोरो शतक प्रहार गर्ने पहिलो ब्याट्सम्यान बनेका छन् ।
सोमबार वीरगञ्जमा सम्पन्न मधेश प्रदेशविरुद्धको खेलमा ओपनर ब्याट्सम्यान आसिफ शेखले दुई सय आठ रन बनाएका हुन् ।
‘रिटायर्ड आउट’ भई पेभेलियन फर्किनुअघि उनले केबल एक सय ४२ बलको सामना गरी १७ छक्का र १५ वटा चौका पनि हिर्काए ।
००
सर्वाधिक शतकको कीर्तिमान
त्रिभुवन आर्मी क्लबका ब्याट्सम्यान विनोद भण्डारी प्रधानमन्त्री कप क्रिकेटको इतिहासमा सबैभन्दा बढी शतक प्रहार गर्ने खेलाडी बनेका छन् ।
विनोदले सोमबार जनकपुरमा सम्पन्न कोशी प्रदेशविरुद्धको खेलमा एक सय ८९ रन बनाएसँगै यो कीर्तिमान उनको नाममा जोडिएको हो ।
उनले एक सय ५० बलको सामना गरी पाँच छक्का र २१ चौका हिर्काएका थिए । विनोदले प्रधानमन्त्री कपको इतिहासमा पाँचौँ शतक बनाएका हुन् ।
उनले प्रधानमन्त्री कपको अघिल्ला संस्करणमा तीन र जारी संस्करणमा दुई शतक बनाएका हुन् । उनले सातवटा अर्धशतक पनि प्रहार गरेका छन् ।
००
सर्वाधिक रनको कीर्तिमान
त्रिभुवन आर्मी क्लबका ब्याट्सम्यान विनोद भण्डारी प्रधानमन्त्री कप क्रिकेटको इतिहासमा सबैभन्दा बढी रन जोड्ने खेलाडी पनि बनेका छन् ।
उनले प्रधानमन्त्री कपको ६१ खेलको ५६ पालीमा कुल एक हजार आठ सय २२ रन बनाएका छन् । यस क्रममा उनले पाँच शतक र सात अर्धशतक प्रहार गरेका छन् ।
सर्वाधिक रन बनाउने ब्याट्सम्यानको सूचीमा आसिफ शेख दोस्रो स्थानमा छन् । उनले ५० खेलको ५० पालीमा कुल एक हजार ६ सय ६२ रन बनाएका छन् । उनले चार शतक र आठ अर्धशतक प्रहार गरेका छन् ।
००
सर्वाधिक योगफलको कीर्तिमान
प्रधानमन्त्री कप क्रिकेटको जारी संस्करणमा सर्वाधिक योगफलको कीर्तिमान पनि बनेको छ । एपीएफ क्लबले मधेश प्रदेशविरुद्धको खेलमा पाँच विकेट गुमाएर तीन सय ९० रन बनाएको थियो ।
प्रधानमन्त्री कपको इतिहासमा कुनै पनि टोलीले बनाएको यो नै सर्वाधिक योगफल हो । त्यसअघि यो कीर्तिमान त्रिभुवन आर्मी क्लबको नाममा थियो ।
यही संस्करणमा आर्मी क्लबले कोशी प्रदेशविरुद्ध आठ विकेट गुमाएर तीन सय ६२ रन बनाएको थियो । तेस्रो ठूलो योगफल पनि यही संस्करणमा बन्यो । नेपाल पुलिस क्लबले एपीएफ क्लबविरुद्ध नौ विकेट गुमाएर तीन सय ५५ रन बनाएको थियो ।
००
एकै संस्करणमा सर्वाधिक रन
गण्डकी प्रदेशका ब्याट्सम्यान अर्जुन कुमाल प्रधानमन्त्री कप क्रिकेट प्रतियोगिताको एउटै संस्करणमा सबैभन्दा बढी रन बनाउने खेलाडी बनेका छन् ।
जारी प्रधानमन्त्री कपमा उनले बनाएको रन संख्या पाँच सय चार पुगेको छ । उनले नौ खेलमा दुई शतक र दुईवटा अर्धशतकको मद्दतले यो रन बनाएका हुन् ।
एउटै संस्करणमा सर्वाधिक रन बनाउने ब्याट्सम्यानको सूचीमा दोस्रो स्थानमा एपीएफ क्लबका आसिफ शेख रहेका छन् । आसिफ शेखले जारी संस्करणमा कुल चार सय ५७ रन बनाए ।
यस क्रममा उनले दुई शतक र एक अर्धशतक प्रहार गरे ।
००
सर्वाधिक छक्काको कीर्तिमान
एपीएफ क्लबका आसिफ शेख प्रधानमन्त्री कपको इतिहासमा एकै पालीमा सर्वाधिक छक्का प्रहार गर्ने ब्याट्सम्यान बने । उनले मधेश प्रदेशविरुद्धको खेलमा १७ वटा छक्का हिर्काएका थिए ।
यसअघि यो कीर्तिमान सौरभ खनालको नाममा थियो । उनले सन् २०१७ मा खेलिएको एपीएफ क्लबविरुद्धको खेलमा ११ छक्का हिर्काएका थिए । त्यतिबेला उनी पश्चिमाञ्चलको टोलीमा थिए ।
००
बाउन्ड्रीबाट सर्वाधिक रन
एउटै खेलमा बाउन्ड्री (छक्का र चौका)बाट सर्वाधिक रन बटुल्ने कीर्तिमान पनि आसिफ शेखकै नामसँग जोडिएको छ । उनले मधेश प्रदेशविरुद्धको खेलमा यस्तो कीर्तिमान बनाएका हुन् ।
उक्त खेलमा आसिफ शेखले बाउन्ड्रीबाट एक सय ६२ रन बटुले । उनले १७ छक्का र १५ वटा चौका प्रहार गरेका थिए । यो सूचीमा आर्मीका विनोद भण्डारी दोस्रो स्थानमा छन् । उनले यही संस्करणको कोशी प्रदेशविरुद्धको खेलमा बाउन्ड्रीबाट एक सय १४ रन बनाए । उनले पाँच छक्का र २१ चौका हिर्काएका थिए ।
००
सर्वाधिक विकेटको कीर्तिमान
नेपाल पुलिस क्लबका ललित राजवंशीले प्रधानमन्त्री कप क्रिकेटको इतिहासमा सर्वाधिक विकेट लिने बलरको कीर्तिमान आफ्नो नाममा पारे ।
उनले प्रधानमन्त्री कपको ५३ खेलको ५१ पालीमा कुल एक सय २५ विकेट लिइसकेका छन् । जारी संस्करणमा मात्र उनले १७ विकेट लिएका छन् ।
प्रधानमन्त्री कपमा दोस्रो सर्वाधिक विकेट लिने बलर आर्मी क्लबका साहब आलम हुन् । उनले कुल एक सय २० विकेट लिएका छन् । यो संस्करणमा उनले १४ विकेट लिइसकेका छन् ।
००
एकै पालीमा सर्वाधिक विकेटको कीर्तिमान
प्रधानमन्त्री कपको यही संस्करणमा सुदूरपश्चिम प्रदेशका हेमन्त धामी र बागमती प्रदेशका सन्दीप लामिछानेले एउटै खेलमा सर्वाधिक विकेट लिने बलरको कीर्तिमानसँग बराबरी गरेका छन् ।
हेमन्तले बागमती प्रदेशविरुद्धको खेलमा सात विकेट लिएका थिए । लामिछानेले कर्णाली प्रदेशविरुद्धको खेलमा सात विकेट लिएका थिए ।
सन् २०२४ मा दीपेन्द्रसिंह ऐरी, सन् २०१९ मा कुमार थापा र सन् २०२५ मा दीपेन्द्र रावतले पनि एउटै खेलमा सात विकेट लिएका थिए ।
००
सन्दीप जोराको नाममा जोडिएको यो कीर्तिमान
यही संस्करणबाट एपीएफ क्लबका सन्दीप जोरा प्रधानमन्त्री कप पुरुष क्रिकेटको इतिहासमा सर्वाधिक क्याच लिने खेलाडी बनेका छन् ।
प्रधानमन्त्री कपमा उनले हालसम्म कुल ४१ क्याच लिएका छन् । जारी संस्करणमा उनले सातवटा क्याच लिइसकेका छन् ।
यो सूचीमा दोस्रो स्थानमा रोहित कुमार पौडेल छन् । उनले प्रधानमन्त्री कपमा कुल ३८ क्याच लिएका छन् । एपीएफ क्लबका रोहितले यो संस्करणमा पनि सर्वाधिक १० क्याच लिएका छन् ।
००
सबैभन्दा बढी खेल खेल्ने विनोद भण्डारी
त्रिभुवन आर्मी क्लबका विनोद भण्डारी प्रधानमन्त्री कप क्रिकेटको इतिहासमा सबैभन्दा बढी खेल खेल्ने खेलाडी बनेका छन् । उनले प्रधानमन्त्री कपमा हालसम्म ६१ खेल खेलिसकेका छन् ।
विनोद कप्तानको रूपमा सबैभन्दा बढी प्रधानमन्त्री कप खेल्ने खेलाडी पनि हुन् ।
यो सूचीमा दोस्रो स्थानमा पनि आर्मी क्लबकै साहब आलम छन् । उनले प्रधानमन्त्री कपमा हालसम्म ५९ खेल खेलिसकेका छन् । तेस्रो स्थानमा रहेका रोहित पौडेलले ५८ खेल खेलेका छन् ।
