काठमाडौं, २३ पुस– डोटी–काठमाडौं सम्पर्क मञ्चको नेतृत्वमा  आइतबार काठमाडौंको माइतीघर मण्डलामा प्रदर्शन गरिएको छ । 
प्रदेश नम्बर ७ को राजधानी डोटी हुनुपर्ने माग गर्दै प्रदर्शन गरिएको हो । 

 प्रदर्शनमा  डोटीबाट निर्वाचित प्रतिनिधिसभा र प्रदेशसभा सदस्य, बुद्धिजीवी, चिकित्सकलगायतको सहभागिता रहेको थियो । 
डोटीका प्रतिनिधिसभा सदस्य प्रेमबहादुर आलेले सबै हिसावले प्रदेश राजधानी दिपायल ठीक भएकाले सरकारलाई दबाब दिन  प्रदर्शन गरिएको बताए ।  उनले आफूहरुको माग पूरा नभएसम्म संघर्षका कार्यक्रम जारी रहने पनि बताए । 
प्रदेश राजधानीको माग गरेर डोटीमा पनि आन्दोलन हुँदै आएको छ । 
सरकारले   धनगढीलाई प्रदेश राजधानी बनाउने तयारी गरेपछि डोटीबासी आन्दोलित भएका हुन् ।