काठमाडौं २४ पुस– राष्ट्रपति विद्यादेवी भण्डारीले जनतालाई सुविधा पुग्नेगरी प्रदेशको अस्थायी राजधानी तोक्न सरकारलाई सुझाव दिएकी छिन् । सरकारले प्रदेशको राजधानी नतोकि प्रदेश प्रमुख मात्र नियुक्त गर्ने तयारी गरिरहेको समयमा राष्ट्रपतिको सो सुझावपछि प्रदेश प्रमुख नियुक्ति अन्योलमा परेको छ । 

राष्ट्रपति भवन शीतल निवासमा मंगलवार बिहान प्रधानमन्त्री शेरबहादुर देउवासँग भएको भेटवार्तामा राष्ट्रपति भण्डारीले प्रदेशको राजधानी तोक्न सरकारलाई सुझाव दिएकी हुन् । प्रधानमन्त्रीका सहयोगीहरुले राष्ट्रपतिबाट प्रदेशको राजधानी तोक्न सुझाव आएको बताएका छन् । यसअघि सरकारले प्रदेशको राजधानी नतोकि प्रदेश प्रमुख मात्र नियुक्ति गर्ने तयारी गरेको थियो । 

कानून मन्त्री यज्ञबहादुर थापाले सोमवार मन्त्रिपरिषद्को बैठकमार्फत प्रदेश प्रमुख नियुक्त गर्ने तयारी भएको आइतवार बताएका थिए । तर सरकारका अर्का एक मन्त्रीले भने सोमवार मन्त्रिपरिषद्को बैठक नभएको बताए । 

प्रदेशको अस्थायी मुकाम तोक्ने तयारी गरेको भन्दै सूचना चुहिएपछि ठाउ ठाउमा विरोध प्रदर्शन भएको थियो । यसअघि सरकारले विराटनगर, जनकपुर, भक्तपुर, पोखरा, दाङ, सुर्खेत र धनगढीमा प्रदेशको मुकाम तोक्ने तयारी गरेको सूचना राष्ट्रिय समाचार समितिले जनाएको थियो । प्रदेशको राजधानी माग्दै पूर्वको धनकुट्टा, विरगञ्ज, पश्चिमको रुपन्देही, डोटी लगायतका जिल्लामा विरोध प्रदर्शन भएका छन् ।

प्रदेशको राजधानी तोक्दा कतिपय ठाउमा जनआक्रोश बढ्ने भन्दै सरकारले अपजस लिन नचाहेको देखिएको छ । वामपन्थी गठवन्धनका नेकपा एमाले र माओवादी केन्द्रले भने प्रदेशको राजधानी तोक्न सरकारलाई दवाव दिएका छन् । 

निर्वाचन आयोगले प्रदेश सभाका लागि भएको निर्वाचनको सम्पूर्ण नतिजा प्रदेश प्रमुखलाई नै बुझाउने तयारी गरेसंगै सरकारले सातवटै प्रदेशमा प्रदेश प्रमुख नियुक्तिको तयारी गरेको थियो । गत बिहीवार भएको सर्बदलीय बैठकमा वामपन्थी गठबन्धनले प्रदेश प्रमुख तोक्न सरकारलाई समर्थन जनाएका थिए । 
फाइल तस्वीर